Diabierna a tuma luga e huramentacion di e ministernan pa e Gabinete Wever- Croes, pa e proximo gobernacion 2017- 2021. Un di esunnan cu a wordo huramenta, tabata Sr. Glenbert Croes. E ta splica mas ariba esaki y kico ta su pensamentonan pa cu esaki.
Sr. Glenbert Croes a splica cu biaha pasa e tabata tin e carteranan, di 1994- 1997/1998 y despues tambe e cartera cu Sr. Chris Romero lo bay ocupa actualmente y e ta sigur cu Sr. Romero lo haci un excelente trabao. Pa loke ta e cartera asigna na dje, Sr. Croes a bisa cu tur hende sa cu e problemanan social na Aruba ta hopi grandi y den e ultimo 8 añanan, e trahado a sinti’e lomba contra di muraya, y semper tabata tin un doño di trabao, cu tabata tin un gobierno di nan banda. Un minister di Labor, mester ta defensor di e digno pueblo trahado. Pero ora situacion ta exigi, mester tin ekilibrio den e decisionnan cu mester wordo tuma. E ta hereda un cartera, caminda cu tabata suheto na corupcionnan grandi cu a conoce te cu aworaki. Lo bin mas casonan di corrupcion di gobierno anterior, ariba diverso puntonan. Esaki kisas lo bira un caso di un embergadura nunca antes bisto. E ta hereda un ministerio di Labor, unda cu e minister di Labor a bay cera. Lo bay pone ordo den cas, haci lo corecto. Tin retonan grandi nos dilanti y lo bay atende cu nan.
Mas aleu, Sr. Croes a sigui bisa, cu e bon cos ta, cu e prome biaha cu el a drenta den politica, e tabata tin 25 aña y awendia e ta mas grandi, esaki ta di tres biaha cu e ta ocupa e puesto di minister. E tin e honor di sirbi e pueblo di Aruba un biaha mas. E lo haci su maximo esfuerso, unda cu kisas no tin fondonan pa yuda, eynan e lo ta presente y lo tin su atencion, apoyo y activismo, den tur bario. Lo percura pa tur asunto na Aruba cu tin su atencion, como Minister di Asuntonan Social y di Labor, e lo t’ey pa e pueblo. Cu Dios su poder, na final di cuater aña, nan lo entrega e digno pueblo, un gestion di gobierno pa un pais miho para y e pueblo lo ta mas feliz y miho para, pa e trabao y gestion haci como e diferente ministernan di Gabinete Evelyn Wever- Croes.
No por keda sin menciona cu pa prome biaha den historia di nos pais, tin un hende muhe como Prome Minister. E disciplina, capacidad y rectitud di e Prome Minister Nobo, nan lo sa di traha den team, pa traha den coalicion di MEP- POR y RED. E tres partidonan a uni den e compromiso pa defende e bon nomber di nos pais, desafiando e retonan nos dilanti, pa cumpli cu nan na un forma cabal.