Diabierna Fundacion Club KIbrahacha tabata e centro di e apertura di Aruba Doet 2018. Sr. Jeffrey Matos, di Fundacion Club Kibrahacha ta amplia.
Fundacion Club Kibrahacha ta existi pa 32 aña caba, unda cu boluntarismo ta e fundeshi di nan existencia mes y di e mesun manera tin 40 boluntario cu ta traha tur siman y ta duna servicio na hende grandi como centro di actividadnan na e fundacion aki.
Ya den e prome siman di Aruba Doet, Fundacion Kibrahacha a haya varios inscripcion di varios compania caba pa duna apoyo na nan proyecto nobo. Esey ta yena nan di motivacion y orguyo caminda cu e fundacion lo keda traha cu mas pasion pa henter comunidad, segun Sr. Jeffrey Matos, di Fundacion Club Kibrahacha.
E principal funcion di club kibrahacha ta pa stimula cu e hendenan grandi pa nan keda mas aña activo den comunidad y esaki lo por wordo logra danki na e participacion di e boluntario. Tambe a wordo splica cu e proyecto cu lo ta bini ta consta di e creacion di un area di hardin den e infrastructura na parti dilanti di club Kibrahacha unda cu nos grandinan lo por sinta y disfruta di e naturaleza,lesa buki y conta historia entre otro.
Por ultimo, cu ayudo di boluntarionan, pero tambe di comercio Sr. Jeffrey Matos a splica cu e proyecto lo keda bay dilanti y cu e iniciativa aki di traha un hardin na Club Kibrahacha ta pa duna un mensahe y un señal cu unda cu naturaleza lo hunga un rol importante. Ta hopi bunita paun ser humano por haya un miho calidad di bida. Sr. Jeffrey Matos a gradici na tur e sponsornan cu ta apoya e causa pa logra nan meta y ta desea hopi exito na tur e organisacionnan di Aruba Doet.