MADRID, Spaña – Un estudio realisa na Spaña a confirma cu e presencia di acido ribonucleico (RNA) di e virus di Zika den e suero materno di forma prolonga por ta un indicador di infeccion di e feto, y alabes di e presencia continua di e virus den e mama.
E trabao, lidera pa dokter Anna Suy, medico adhunto di e Unidad di Infeccionnan Perinatal di e Servicio di Obstetricia Vall d’Hebron y investigado di e grupo di Medicina Materno y Fetal di Vall d’Hebron Institut di Recerca (VHIR), ta publica den e revista New England Journal of Medicine.
E muhe a sufri un erupcion den e torso, man y pianan y a duna positivo pa Zika den muestranan di suero den sanger. E positivo a mantene durante 89 dia, es decir 107 dia despues di e inicio di e sintomanan, den siman 29 di gestacion, aunke e pruebanan di urina, vagina y endocervix a duna di ta negativo.
Segun investigadonan, pruebanan ecografico realisa den siman 12 y 15 di gestacion no a revela anomalianan den e feto. A cambio, e neurosonografianan realisa desde siman 20, si a mustra problema den su desaroyo celebral. E indicionan aki a confirma atrabes di e pruebanan di resonancia magnetico realisa, caminda cu e feto no ta presenta otro anormalidadnan.
Pruebanan di virus di Zika den e likido amniotico a duna positivo y di hecho, e carga viral den e muestra di likido amniotico tabata mas halto cu e carga viral den e suero di e mama.
E parto a tuma luga den siman 37 di embaraso, momento cu e pruebanan di presencia di RNA di e virus den e suero materno, urina, fluido amniotico, placenta, membrana y lombrishi tabata negativo.
E recien naci, cu a presenta microcefalia, tambe a duna negativo den tur e pruebanan realisa.
E autornan di e estudio a apunta cu e datonan obteni ta confirma estudionan anterior cu a indica e posibilidad cu e presencia continua di e virus di Zika den sanger di e mama por atribui na e replicacion den e feto of den e placenta.
E investigadonan a basa riba e hecho cu e carga viral den e likido amniotico tabata superior na e suero materno y caminda cu e presencia di e virus ta mantene stabil den e sanger di e mama durante 14 siman pa despues baha di forma subito y no progresivo y finalmente caminda cu e presencia den e sanger alabes di e anticurpanan neutralisa y RNA viral.
Alabes, otro indicado ta cu no a detecta RNA di e virus den urina di e mama, di forma contrario na loke ta indica pa e literatura existente.
E investigadonan ta sospecha cu e resultadonan negativo den e pruebanan di e recien naci ta indica cu e infeccion a tuma luga durante e bida prenatal, por lo tanto ta posibel cu e sistema inmunitario tabata capacita pa desaroya anticurpanan di Zika prome cu nacimento.
Fuente: El Universal