Biblioteca ta conta cu 17 autor y ilustrador di Hulanda, Boneiro, Corsou, Surinam y Aruba pa su Festival di Buki pa Mucha. Den curso di otro siman invitadonan di afo lo yega Aruba. Riba e website di biblioteca ta informa publico di tur autor participante. Tres autor/ilustrador di Hulanda lo bishita diferente scol den prome siman di November. Nan lo inspira mucha cu storia y ilustracion. For di Hulanda biblioteca a invita Mylo Freeman, Evelien van Dort, y Jeroen Hoogerwerf.
Mylo Freeman ta ilustradora, musico y escritora. Despues di su prome publicacion titula ‘Potje!’ Mylo Freeman a produci hopi mas buki di prenchi pa mucha chikito entre otro e serie di prinses Arabella. Mylo tambe a produci un obra teatral basa riba e personahe di prinses Arabella, un app y un serie di e popchi. Mylo Freeman ta traha hunto cu dos colega riba promocion di diversidad den buki pa mucha.
Evelien van Dort a skirbi como 70 buki pa mucha den categoria di edad di 3 pa 14 aña. E temanan Naturalesa, Amistad y Bestia ta hunga un rol importante den su storianan pero e ta skirbi buki historico tambe y storia di muchanan poco special, kisas di mucha cu tin hopi curashi, mucha cu ta pasa den aventura y cu ta siña for di esaki. Pa Evelien ta importante cu e storia ta bunita y ta tene e mucha den suspenso y cu alabes e mucha ta siña algo for di e storia y ta siña conoce su mes poco mas miho.
Jeroen Hoogerwerf a traha hunto cu Fred Diks riba e buki di e Festival di Buki pa Mucha ‘Super wela den coma’ . Y hunto cu Liliana Braamskamp-Erasmus y Marielle van Beek el a traha riba e buki ‘Overal Opa’s en Oma’s’. Jeroen Hoogerwerf tin su propio cas editorial na Hulanda, Levendig Uitgever.
Apertura di e Festival ta diabierna dia 28 di October di 6or pa 8or PM, patras di e edificio di biblioteca na Playa. Bishitanan na e scolnan lo ta den siman di 31 october pa 4 november 2016.
Tur dia trai merdia lo tin presentacion di diferente autor na biblioteca na Playa como na San Nicolas na Sta. Theresita Center. Orario: 3or pa 4or di atardi. Tur mucha ta bonbini!