CARACAS, Venezuela- E tipo di cambio paralelo den e cayanan di e pais a marca un avance nobo cu ta refleha e inflacion cu ta asotando e pais. Salario minimo ta cay na menos di tres dollar. Ni un siman pasa, e divisa Venezolano tabata cotisa na 50 mil bolivar.
E bolivar di Venezuela ta sigui su caida na paso rapido frente e dollar Mericano, na momento cu e ta supera 80 mil unidad pa un dollar, den e cambio paralelo riba cayanan di e pais, cual ta rigi e mayoria di e actividadnan comercial di e pais, mei mei di e crisis.
Segun e webpage Dolar Today, cu ta calcula cu e balor di e dollar frente e bolivar leu di e tasanan oficial marca pa Banco Central di Venezuela, un dollar ta wordo bendi ariba mercado negro na 82.271 bolivar. Ni un siman atras, e divisa Mericano a supera e barera di 50 mil bolivar.
E portal, considera pa e regimen di Nicolas Maduro como un instrumento mas di e guera economico den su contra ta prohibi na Venezuela y e ta haya su datonan di calculo di e operacionnan di cambio cu ta wordo efectua na Caracas, como tambe den e ciudad Colombiano di Cucuta, caminda cu miles di Venezolano ta crusa pa realisa nan compranan y transaccionnan, unda cu e mester di mas bolivar pa haya un dollar: 94 mil. Di e manera aki, e ta sirbi di referencia pa miyones di comerciante y consumidornan mei mei di un inflacion cu ta supera 800% pa loke ta 2017.
E portal a realisa tambe un calculo di e dolar Bitcoin, cu ta destaca como un metodo cu “fuentenan independiente, comprobabel y basa ariba oferta/demanda di e criptomoneda”. E indicador aki diamars a yega te na 86.626 bolivar pa un dollar.
E tasa paralelo ta supera cerca di 8 mil biaha e balor di e tasa oficial di cambio mas abao. Cu e cotisacion aki, e salario minimo (177.507 bolivar) ta menos de tres dollar, mientras cu e “ingreso integral básico” (salario mas un bono de alimentacion, cu ta yega 456.507 bolivar) cual ta menos di 6 dollar.
E regimen Chavista tin e monopolio di benta di divisa den e pais for di 2003 y den e ultimo lunanan el a corta den gran medida e asignacion di moneda stranhero debi na e profundisacion di e crisis economico y e caida di prijsnan di petroleo, su fuente principal di financiamento.
Companianan priva y organisacionnan empresarial Venezolano ta keha di no a haya suficiente dollar for di estado pa nan importacionnan, pa cual nan mester a cumpra nan divisanan riba e mercado paralelo y fiha e prijsnan segun e cambio di Dólar Today.
Esaki a trece cun’e e escasez di alimento na Venezuela y otro productonan basico cu si ora hayanan y si hayanan, ta wordo bendi na prijsnan demasiado halto pa e gran parti di e Venezolanonan.
Fuente: https://www.infobae.com