Si enfoca riba “Cost of doing business” pa loke ta e revolucion economico, kier bay incentiva comercio di Aruba caminda cu kier crea entre otro un cambio di impuesto ‘directo’ pa ‘indirecto’ akinan na Aruba. Lo percura pa reduci den e caso aki e gastonan fiscal cu tin cerca nos empresarionan. Particularmente locual ta trata inkomstenbelasting y winstbelasting.
Dividendo
Na dado momento por tuma den consideracion hasta e aspecto di belasting riba dividendo caminda cu ta propone pa crea un fondo cu ta bay fomenta of incentiva e aspecto di entrepreneurship aki na Aruba. Esaki ta encera cu na cierto momento cu tin fondonan cu ta keda pega riba cuentanan di comerciantenan. Si ta inverti den un tipo di “growth fund light”, cu ta bira un tipo di fondo di garantia pa negoshinan nobo por wordo crea, negoshinan chikito, mediano of hasta negoshinan por wordo amplia y crea entrepreneurship aki na Aruba. Hasta por bisa cu ta bay duna un special riba e dividendo aki cu e hendenan por saca e fondonan aki. Parti di dje como comerciante y parti di dje lo bay den e “growth fund” aki cu lo bay pa fomenta/incentiva e aspecto di entrepreneurship aki na Aruba, lider di POR Otmar Oduber ta splica.
Directo pa Indirecto
Di otro banda door di bay di impuesto directo pa indirecto tambe bo ta crea flexibilidad den e aspecto di winstbelasting como tambe inkomstenbelasting. Varios gobierno a papia riba dje (MEP y AVP), awo ta yega e momento pa introduci esaki caminda cu naturalmente ta trece ventahanan unda cu ‘ontduiking’ di belasting of esunnan cu no tabata paga nan “fair share” pa loke ta belasting, lo paga esaki completo di un banda.
Permisonan
Di otro banda bo ta bay crea tambe un introduccion di un ley di restauracion economico (crisis en herstelwet), pa haci eficiencia den gobierno hopi mas facil den toma di desicionnan. Na momento cu mester tuma un permiso, mester crea un vestiggingsvergunning, bouwvergunning, mester otorga terenonan, verkavel terenonan, pa di e forma ey por intensifica e actividadnan economico den nos Pais, cu durante e ultimo añanan ta asina stagna, manera cu e ta na e momentonan aki. Banda di e reforma fiscal, e ley aki lo mester percura pa kita e ‘redtape’ nan pa desicionnan cu mester wordo tuma ora kier habri un restaurant, cafe of tienda/negoshi akinan na Aruba, cu e ta dura bo asina hopi luna cu gobierno ta perde entrada. Pero economia tambe ta perde su participacion cu bo por haci na un manera hopi mas eficiente. Banda di e aspecto fiscal aki, pero tambe e aspecto di e desicionnan cu mester wordo tuma via di un “crisis en herstel wet”.
Flexibilisacion Leynan Laboral
“Nos mester bay na e di dos fase cu nunca a tuma luga durante e ultimo 4 añanan pa loke ta trata e flexibilisacion den nos leynan laboral. Cierto momento bo mester por crea mas eficiencia y productividad cerca e inversionista, cerca e comerciante pa nan tambe tin e flexibilidad necesario den nos leynan laboral pa por haci un combinacion perfecto pa por crea industrianan nobo tambe na Aruba.”
Financiamento alternativo
Percura pa sistemanan alternativo di financiamento manera entre otro “venture capital”, “crowdfunding”, “micro financing” cu na e momentonan aki ta asina dificil cu mester bay papia y convence/instrui hasta caminda ta necesario banco central y banconan comercial cu den e epoca aki di 2017 no por ta posibel cu ainda na Aruba no por haci un “crowdfunding” cu ta algo cu ta tuma luga na tur parti di mundo y caminda ta crea oportunidadnan pa diversificacion economico den bo Pais.
Esaki ta aspectonan cu nos mester bay pone atencion na nan, percura pa trato igual tambe caminda cu no ta depende di un gobierno of di un Minister cu bo conoce pa e por fasilita y/of yudabo cu un pida tereno of pa bo haya un permiso. E cosnan aki mester ta transparente, electronico, fasil, accesibel, esaki ta e unico forma cu nos ta mira cu despues di 22 di September nos lo por bay impulsa nos economia den un direccion caminda cu inversionista, comerciante y economia di Aruba ta bay haya un posibilidad di hala rosea fresco un biaha mas. Caminda cu ta sinti cu tin oportunidad igual pa tur hende cu e flexibilisacionnan cu mi a bisa tanto den e ambito fiscal pero tambe den e ambito laboral, pa por duna un espacio cu na final di dia si bo logra di reduci e impuestonan aki manera nos ta ofrece, duna mas oportunidad pa inversion tuma luga.
Posibilidadnan amplio den economia
Loke bo ta bay haya ta masa den e economia y posibilidadnan mas amplio den economia, mas hende ta traha y ta crea mas labor cu gobierno por cobra su loonbelasting. Tambe e lo por bira e ingrediente specifico cu ta bay crea e desaroyo economico banda di un turismo cu nos a conoce cu a carga e ultimo añanan nos economia, un otro ambito/ parti di nos economia cu lo mester bira uno cu lo vibra bek, cu ta crea confiansa den nos comunidad y caminda gobierno na su turno ta haya su ‘fair share’ pa por cumpli cu tur e necesidadnan y compromisonan cu tin riba tereno di entre otro salubridad, enseñansa y husticia.