Weekend tras di lomba Aruba por a conta cu un mahestuoso torneo di softball cu a tuma luga na veld di Aruba Juniors. Un apertura colorido y hopi bunita unda ekiponan New Angels di Bonaire, Upsetterz di St Maarten, Treasure New Era, Nos Gozo y Rising Trotters di Corsou mas Impex Thiel Angels di Aruba a desfila riba tononan di drumband Scouting Ora Ubao. Publico basta grandi a gosa un mundo di esaki cu aplausonan mereci momento cu kada ekipo a pasa saluda dilanti tribune. MC Tinchi Faro a yama bon bini na baluartenan y tur presente. Himno di Aruba a wordo interpreta pa e famoso artista Sashah Figueroa. A continua cu un discurso di Presidente di e Comision Organisado di Aruba Juniors Angels IMPEX-Thiel Sra. Mila Martinus e motor tras di e evento aki kende a yama tur ekiponan bon bini y a expresa su alegria di mira tanto ekipo internacional participando y fanaticada alegre pa apoya cada team. Presidente di Aruba Softball Bond Sr.Endy Croes a continua cu su discurso mientras na final mesora MC a bay over na yama baluartenan na kende e torneo aki a wordo dedica pa ricibi nan reconoccimento y homenahe. E maestro Jesus “Joy” Kock tabata e prome cu a ricibi merecidamente su reconocemento mientras cu Amado Rosina a sorpresa Joy cu un extra premio cu tabata un potret di añanan 70 di directiva di ADAIMA di cual ambos a forma parti. Irena Balijn y Helen Rasmijn ta e otro dos baluartenan kende tambe a wordo homenahia pa nan aporte y pa tur locual nan a significa pa e deporte di softball. Empresario Felix Losano di IMPEX a haci entrega di e premionan. Despues a bay over na lansamento di e promer bala unda Joy Kock a fungi como bateador yen di style recordando su temponan di gloria, Irena Balijn tabata pitcher mientras cu Helen Rasmijn tabata e catcher pa asina duna inicio oficial na e di 5th Caribbean 35+ Women Softball Tournament. Mesora e ekipo di Impex-Thiel Angels Aruba a hunga nan prome wega vs New Angels di Bonaire. Mas despues lo bin cu e resultadonan. Pues un bunita y colorido apertura. Un palabra di pabien na henter e comision organisado. Job Well done.