Un biaha mas dump ilegal na Tamarijn/Sero Lopes

0

Diabierna atardi, 23 di Juni, e dump ilegal di Tamarijn/Sero Lopes tabata na candela atrobe.
Huma a sali henter merdia for di tera. E dump aki ta causa molester serio pa e habitantenan di bario Tamarijn/Sero casi binti aña caba. E prome protesta formal a tuma luga na aña 2001 ora habitantenan a firma un peticion. Na ana 2010 mesun cos a sosode, atrobe sin resultado duradero.
Na 2012, otro candela na e dump a resulta na formacion di un grupo di trabao ministerial. Nan a formula un maneho nobo yama Cero Tolerancia pa control riba dumpmento ilegal. A desaroya instrumentnan pa ehecuta e maneho y cera dumpnan ilegal. A stipula multa pa diferente tiponan di dumpmento ilegal. Tambe a forma un grupo di trabao pa sigura e efectividad di e maneho.
Dia 3 di April e aña aki, un candela fuerte a tuma luga na e mesun dump. Un bes mas habitantenan a acerca polis y Gobierno. Durante un town hall meeting cu entre otro minister di Husticia y polis a palabra cu minister lo busca solucion y wak con por yena e dump na un manera controla, sigur y sano, manera den pasado tabata e caso na algun otro dumps. Polis lo a hiba e caso pa Ministerio Publico.
Actualmente, tin un caso sumario andando contra doño di e tereno na Corte di Prome Instancia.
Abogadonan di ambos partido keto bay ta negocia pa yega na un acuerdo.
Mientrastanto, lamentablemente e dump di Tamarijn/Sero Lopes keto bay ta causa problemanan serio. Te awo, e dump no ta yena y keto bay holo ta drenta casnan, causando problema di garganta etc. Diabierna 23 di Juni huma a cuminsa sali un biaha mas for di e dump. Despues di 20 aña di dumpmento sin control, e huma probablemente ta toxico. Despues di dos luna y mey, mester constata cu gran parti di e dump ainda no ta yena manera priminti. Ministerio Publico ainda no a ricibi rapport di polis.
Diamars, 27 di Juni nos a organisa un conferencia di prensa pa elabora riba e problematica di nos bario. Aruba ta conoce mas of menos 35 dump ilegal. Mirando e peliger pa e salud di nos y nos yiunan, pa nos flora y fauna, habitantenan di Sero Lopes a dicidi pa no warda mas y acerca Ministerio Publico cu un peticion pa persigui e doño di tereno. Tambe nos ta pidi minister y Cuerpo Policial Aruba pa continua nan esfuersonan pa yega na un solucion duradero pa e bario y futuro sano pa nos famianan.

Fabia Croes, Luc Alofs