Den Haag, HULANDA – Partidonan den Tweede Kamer ta preocupa cu e retencion di algun ciudadando Turco Hulandes na Turkia. E ciudadanonan aki no mag bandona e pais, relaciona cu e intento di golpi di estado na Juli. Algun di nan tin algun luna caba cu nan ta wordo stroba di sali for di e pais.
“Nos mester haci tur loke ta posibel pa saca lo mas pronto posibel esunnan cu kier bandona e pais”, segun Sadet Karabulut (SP). Mirando e hecho cu derechonan humano na Turkia ta deficiente, ta haci e preocupacion ainda mas preocupante.
GroenLinks ta hay’e inacceptabel y lo kier pa Minister Bert Koenders (Relacionnan Exterior) bisa con e lo haci pa yuda e personanan aki for di e situacion penoso aki. “Limitacion di nan derecho di libertad ta bay contra di leynan Turco y Hulandes tanten cu nan no wordo acusa di nada. Hulanda mester zorg pa tur ciudadano Hulandes bin cas bek”, segun Bram van Ojik.
Segun Raymond Knops (CDA) esaki ta otro muestra mas cu Turkia no ta worry cu estado di derecho. “Esaki ta algo puramente un poder politico di (president) Erdogan riba lomba di personanan cu basicamente ta secuestra”.
“Esaki ta un mal paso di Turkia”, Sjoerd Sjoerdsma di D66 a declara. “Duna ciudadanonan Turco Hulandes prohibicion pa sali sin cu tin un denuncia of un procedura hudicial ta un inhusticia y ta destabilisa e personanan aki nan bida cu nan no por bandona Turkia sin mas y cu mester meld ariba un base diario”.
Fuente: www.anp.nl