ANKARA, Turkia – Turkia a blokia e acceso na Wikipedia, pa relaciona e pais cu actividad terorista, e Gobierno a bisa diasabra, di acuerdo cu e agencia estatal Anadolu.
E articulo y comentario den e popular enciclopedia online, a señala Turkia como “en cooerdinacion y alinea” cu gruponan terorista, e Ministerio di Transporte, Asuntonan Maritimo y Comunicacionnan Turco a bisa.
“El a converti den parti di un fuente di informacion cu ta haci un campaña di difamacion contra Turkia riba arena internacional,” e ministerio a bisa.
Turkia a urgi Wikipedia a retira e conteindo ey, pero e enciclopedia sin animo di lucro a nenga, e Gobierno a bisa.
Una bes cu Wikipedia cumpli cu e demanda di Turkia, e prohibicion lo wordo lanta.
Turkey Blocks, un grupo cu ta vigila censura, a bisa cu e blokeo na e acceso den tur edicion di e enciclopedia a cuminsa diasabra, pa 8’or di mainta local.
Wikimedia Foundation, un organisacion sin animo di lucro ta apoya Wikipedia, a bisa cu nan ta trahando “activamente cu asesoramento externo pa busca un revision hudicial di e decision cu ta afecta e acceso na Wikipedia.”
“Wikipedia ta un fuente rico y valioso di informacion confiabel y neutral,” e fundacion a bisa den un comunicado. “Nos ta comprometi na sigura pa Wikipedia mantene su mes disponibel pa e miyones di persona cu ta confia den dje na Turkia.”
E fundador di e site, Jimmy Wales, a bisa riba Twitter cu ‘e acceso na informacion ta un derecho fundamental. Pueblo Turco, semper nos lo tey cu boso y mi lo ta luchando pa e derecho aki.”
Hopi observador a bisa cu Turkia – miembro di NATO y aliado di Merca – a dal un giro autoritario ora cu ta trata di e liber fluho di informacion.
E pais a blokia varios rednan social den pasado, manera Twitter y YouTube, y e Comite di Proteccion di Periodista, a cualifica e pais como “e pio carcelero di periodistanan na mundo.”
Fuente: CNN en Español