RIO DE JANEIRO, Brazil- “Den e favelanan tin un mafia cu ta controla tur cos. Esey ta narcotrafico. Pero no tin mester di preocupa. Nada no ta pasa, e ta e luga mas sigur di Rio de Janeiro y boso por saca cuanto potret boso kier. Martin ta un guia y ta traha den un empresa di turismo cu ta organisa excursionnan den fourwheel drive na Rocinha, e favela mas grandi di Brazil. E ta un especie di safari den un di e barionan menos desaroya di e ciudad, unda e turistanan por wak “con e hende pobernan ta biba”. Tin varios compania cu ya caba pa mas di 25 aña ta trece e “Gringonan” na e favela aki, unda cu mas di 70 mil persona ta biba, di acuerdo cu e censo oficial. Pero según e calculonan di e residentenan, tin mas di 200 mil persona bibando den e favelanan. E ta un ciudad den un ciudad, un laberinto di cayanan yena cu hende, brommer y mercancia unda cu ta dificil pa orienta bo mes, sin e yudansa di un guia, segun El Confidencial.
“Den e ultimo simannan tabata tin un guera, pero tur cos ta bou di control awo. Nos por drenta sin problema, segun Martin ta splica. E ta referi na e conflicto reciente entre miembronan di e mesun grupo pa e control di narcotrafico, cu a somete e residentenan na tiroteonan violento cu fusilnan di guera pa dos siman. Gobierno mester a manda 950 soldaat pa purba reestablece ordo.
Durante e splicacion di e guia, turistanan, un pareha Neozelandes, un pareha di Venezolano residencia na Buenos Aires y dos hoben di Marsella ta wak otro poco confuso, pero ta forsa un sonrisa. Nan ta completamente aheno ta e hecho cu algun dia prome dos turista di Costa Rica a haya nan mes envolvi den un tiroteo den pleno “tour” y cu nan mester a tira nan curpa abao na vloer pa evita e awasero di balanan.
Fuente: https://www.elconfidencial.com