Adicional na e aumento di 7.5% den e cantidad di turista cu Aruba a conoce durante prome mita di aña, Prome Minister Mike Eman ta sumamente satisfecho y orguyoso tambe pa loke e cifranan reciente den e sector ta indicando. Esey ta cu nos bishitantenan ta sumamente contento di mira con Gobierno ta trahando riba mehoracion di henter e isla, y no unicamente di e areanan turistico. Den pasado tabata wak cada bes otro hotel bunita bin acerca, pero esey no necesariamente ta haci nan contento.
Aruba tin pa hopi aña un turismo di cinco strea cu hotelnan sumamente bunita; Aruba ta conoci como e pais cu un nivel hopi halto di turista cu ta ripiti; Aruba ta conoci tambe como un pais trankilo y di siguridad. Loke a bin acerca awo y cu ta fortifica e posicion di Aruba, ta cu turistanan ta mira cu Aruba no ta manera hopi di e islanan Caribense caminda den e espacio di hotel bo ta mira bunitesa y prosperidad, pero ora bo sali p’afo, bo ta mira hopi deterioro, hopi pobresa y hopi decadencia.
“Na Aruba nan ta bisa cu ora nan sali p’afo, nan ta mira un empeño grandi di e gobernacion local pa trece un calidad di bida mescos cu tin na hotel. Ta pone atencion tambe pa e bario y scolnan y espacionan publico; pa e pueblo mes por disfruta di e calidad di bida cu e propio turismo ta ofrece e gobierno e entrada pa haci’e, pero hopi aña e entrada ey no a wordo utiliza pa haci e cambio pa e pueblo mes y awe esey si ta sosodiendo,” e mandatario a señala.
Turistanan ta core rond y ta wak cu scolnan ta wordo renoba, cu infrastructura ta wordo renoba, cu un hospital nobo ta kedando cla, nan ta corda con tabatin un containerhaven basta mahos y awe nan ta wak cu esaki a wordo cambia di destinacion y ta bin areanan bunita. Tur esey ta fortificando e posicion cu Aruba tin den bista di e turista y ta haci hopi mas agradabel pa e turista bishita.
Limpieza tambe ta un factor importante y trahadonan di e sector turistico por duna fe di e comentarionan aki di nos bishitantenan. Prome Minister Eman ta gradici tur esnan cu ta traha cant’i caminda y ta percura pa e limpieza cu ta fortaleciendo e producto Aruba; logicamente banda di e trabou di mercadeo cu ATA ta haci; tur esaki ta importante. “Pero e realidad mas importante pa e turista ta e hospitalidad di nos hendenan. Cu nan ta keda ta e hendenan cu na un forma amabel y amoroso y cu hopi sentimento ta duna atencion na tur esnan cu ta yega Aruba; y na mesun momento tur e renobacion y cambionan cu ta haci Aruba asina bunita.
“E sentido di aprecio cu bo ta haya pa esey ta duna nos energia pa sigui traha y ta bira tambe un momento di satisfaccion y orguyo ora hendenan di afo ta bisa cu loke ta pasando na Aruba den adelanto y progreso na e pais, y no na e hotelnan, ta enfocando riba e calidad di bida di e hende. Nan ta sinti cu e prosperidad cu a crea hunto cu turismo tey pa wordo comparti cu cada ciudadano, den tur sentido y esey ta duna nos un sentido grandi di orguyo,” Prome Minister Eman a finalisa bisando.