Turismo na Las Vegas ta sufri despues di e tiroteo

0

LAS VEGAS, Merca- E sector turistico di Las Vegas ta prepara su mes pa un caida den su ingreso despues di e tiroteo cu a cobra vida di 58 persona den un festival di aire liber. Analistanan cu ta sigui finansas di companianan di casino di cerca, a bisa cu Las Vegas lo wak un caida a corto plaso den e cantidad di bishitantenan despues di e masacre.
Casino y polis probablemente lo mester reforsa su medidanan di siguridad despues di cu Stephen Paddock a logra drenta den su camber di hotel cu mas di 20 arma y a para su auto yena cu explosivonan den e parkeerplaats.
E frase: “Loke Pasa na Vegas, ta keda na Vegas:, cu di un manera of otro ta promove e ambiente di fiesta sin control, a wordo poni ariba hold despues di e tiroteo.
E billboardnan electronico cu normalmente ta promove restaurantnan, concierto, bailarinanan y otro forma di entretenimento awo ta mustra un liña telefonico pa e victimanan y nan famia, hunto cu e palabra di gradicimento na e rescatistanan y empleadonan di e casinonan.
Sin embargo, e prijs di e accionnan di e principal companianan di casino den e ciudad a registra perdidanan despues di e tiroteo, cual ta indica cu e atake lo tin su efecto den e sector aki. Analistanan di e banco di inversion Morgan Stanley a pronostica cu e tiroteo di baha e demanda den e mercado di Las Vegas, pa mas o menos 6 luna y cu lo tin un impacto economico di 4 pa 6%.
Analistanan a analisa e efecto di e atakenan terorista “den ingresonan pa camber disponibel” , un indicador clave di e desempeña di un compania di hospedahe, den diferente mercadonan pa e impacto potencial di e tiroteo.
E informe a bisa cu no ta tur e mercadonan ta mescos, pero e efectonan riba e turismo di evento manera atake ariba clubnan nocturno na Orlando, Florida gradualmente a bira menos.
Dia 1 di October Paddock di 64 aña a kibra bentananan di su camber ubica ariba piso 32 di e hotel casino Mandalay Bay y a tira contra di e cientos di asistentenan di un festival di musica country cu tabata na un para di meter leu, pa despues kita su mesun bida.
Fuente: https://www.ap.org