Luna di Juli ta mustra un mehoracion si compara esaki cu juli 2016, na unda por mira un aumento di 2.9% turista ‘stay-over’. Esaki ta 102,272 bishitante en total pa nos destinacion pa cu e luna di Juli di e aña aki. Si compara juli 2016 cu juli 2017, no obstante e caida di mercado Venezolano, e aumento aki ta un indicacion di stabilidad y crecemento continuo di Aruba su turismo. Alabes, e cifranan ta indica crecemento den mercadonan clave pa Aruba, manera Merca, Canada y Europa. Si exclui Venezuela, e crecemento aki ta uno di 8.1%, ekivalente na 92,375 bishitante stay-over.
Durante e prome 7 luna di 2017, 629,015 turista a bishita nos isla, cual ta 7.0% menos cu e mesun temporada aña pasa. Si nos exlui e bishitantenan Venezolano, por mira un aumento di 7.7%. E mercado di Venezuela, manera ta bon conoci, ta conociendo caida cual sigur ta impacta e cifranan di cantidad di bishitante. No obstante ingreso pa pais Aruba ta fuerte y ta ilustra cu e impacto di caida den volume di e mercado Venezolano ta minimo y ta normalisando.
Turismo ‘stay-over’
Aruba ta wordo representa den tres diferente continente. Compara cu juli aña pasa, pa 2017 e turismo procedente for di e continente Norte Americano a aumenta cu 9.2% y ta trece 68.0% di total di turismo pa nos destinacion. Na juli, Merca a aumenta cu 8.9% y Canada cu 18.1%. Pa e prome 7 lunanan di 2017, e continente aki a subi cu 8.9% pa turismo pa Aruba.
Continente Latino Americano a baha cu 8.0% di cual Venezuela a baha cu 29.1% compara cu juli aña pasa. Colombia a subi cu 22.7%. E continente di Latino America ta trece 20.6% di e total di turismo pa luna di juli na nos isla. Pa e prome 7 lunanan, turismo procedente di Latino America a baha cu 42.3% primordialmente mara na caida for di Venezuela.
Pa loke ta Europa por nota un aumento di 2.6% compara cu e mesun luna aña pasa. Hulanda a baha cu 3.0% y Reinonan Uni a aumenta cu 12.5%. E continente Europeo ta representa 8.5% di turismo pa Aruba pa luna di juli.
Pa e prome 7 luna, Europa a trece 6.3% turista mas pa Aruba compara cu e mesun temporada na 2016.
Turismo crucero
Durante Juli 2017, 31,888 pasaheronan crucero a bishita nos destinacion riba un total di 14 diferente barconan crucero. Compara cu luna di juli aña pasa, turismo crucero a crece cu 68.5% (juli 2016 Aruba a haya 18,921 bishitante for di 8 crucero). En total pa e prome 7 luna di 2017, Aruba a ricibi 467,025 pasaheronan crucero for 197 diferente barco. Esaki ta ekivalente na un aumento di 18.2% pasahero adicional pa nos isla (10 barco crucero mas) compara cu e mesun temporada aña pasa .
Turismo en general pa Aruba:
Merca su prestacion ta fuerte, hunto cu diferente otro mercado. Parti esencial di e strategia di A.T.A. tabata pa sigura cu entrada pa medio di turismo wordo afecta menos cu ta posibel. Pa esaki a inverti entre otro aña pasa AWG 4 miyon adicional den mercadeo na Merca, cual a pusha resultado di ultimo kwartaal di 2016 y di e prome 6 lunanan di 2017. Si compara volumen di Aruba pa cu otro destinacionnan den region di Caribe, por ripara cu nos destinacion ta wordo afecta fuertemente pa cu e situacion di Venezuela, aki mester tene na cuenta cu Aruba ta e mercado primario pa Venezuela tambe, den area di Caribe. E impacto di Venezuela ta wordo sinti na Aruba relativamente mas riba area di volumen, pero no riba aspectonan cu ta mara na ingreso pa medio di turismo. Venezuela ta keda un mercado cardinal, pero ora ta papia di mantene y sigui desaroya Aruba su turismo, ta importante pa sigui cu e enfoke riba mercadonan principal y continua na explora mercadonan nobo atravez di strategianan agil y diversifica.
Hotelnan / AHATA
Segun Aruba Hotel and Tourism Association pa e luna di Juli, e ‘Average Daily Rate’ (ADR) a aumenta cu 3% compara cu 2016. Esaki den cifra ta US$ 203.67 na 2016 compara cu US$ 209.72 pa 2017. E rendimento pa camber disponibel, e asina yama RevPAR a aumenta cu 6.4% di US$ 170.99 na 2016 pa US$ 182 na 2017. E anochinan ocupa (ORN) pa camber a aumenta cu 4.5%.