Un topico cu sigur a hala hopi atencion, tabata e anuncio haci door di gobierno di e aumento di salario minimo, entrante 1 di Augustus, 2017. Minister di Finansa, Sr. Angel Bermudes ta splica dicon a tarda pa anuncia e aumento di salario laat durante un entrevista.
Minister Bermudez a cumisna na splica cu na comienso di e aña aki, Conseho di Minister a reuni y a base di consehonan concerni, e tempo ey a tuma decision pa ahusta diferente pagonan, cu ta wordo haci over diferente topiconan cu ta wordo regla pa ley. Den e caso aki, ta e sueldo minimo y tambe e suma di onderstand, como tambe e AOV uitkering. E decision aki ta core su procedura legal, depende di e topico. Esun di e sueldo minimo ta bay pa SER, cu ta duna su conseho y despues e ta sigui su trayecto legal, te cu cierto momento e ta wordo formalisa den un forma di un Landsbesluit firma door di Sr. Alfonso Boekhoudt, Gobernador di Aruba y e Minister concerni. El a tuma basta tempo, ya cu ta mas di shete luna despues di e decision den Conseho di Minister y ta awo esun di sueldo minimo a keda concretisa. Esun di AOW a keda concretisa mas lihe y a wordo aproba luna pasa den Staten. Asina ey cada un di e topiconan aki tin su trayecto legal.
E minister no ta compronde dicon e aumento a bin di sorpresa, pa motibo cu e.o. e decision aki dado momento ta pasa pa Sociaal Economische Raad (SER), caminda cu doñonan di trabao y sindicatonan ta forma parti di dje, unda ta wordo conseha ariba dje, pa ora cu e bin bek pa Conseho di Minister. Motibo pa cual a tarda pa wordo haci publico, ta door cu mester warda te ora cu e ta legalisa den e Landsbesluit, e ora ey no mas por anuncia esaki.
Mirando cu e ruta cu e proposicion aki ta cana, dus via SER unda cu for di eynan caba comercio por a tuma nota caba, di e proposicion aki. Pero e minister ta enfatiza cu te ora cu e keda legalisa, te ora cu e por adaptacion por wordo publica. Akinan ta un grupo di trahadonan cu ta cay bou di e proteccion di leynan laboral y ta pesey gobierno tin un tarea caminda cu tur aña nan ta evalua e desaroyonan, e inflacion, indexering. Y na cierto momento ta adapta e sueldo minimo. Esey ta conta tambe pa personanan cu ta cobra onderstand y tambe pa esunnan cu ta cobra AOV, manera ya caba a wordo menciona, segun minister di Finansas, Sr. Angel Bermudez.