Gang di Arte ta un competencia hubenil, cu ta pa hobennan di 13 – 21 aña di edad y di scolnan secundario y nivel avansa.
Esaki ta di 11 edicion di e Competencia Hubenil Gang di Arte Aruba.
Departamento di Cultura Aruba ta hopi contento cu e proyecto aki, cu ta uno anual y como competencia hubenil Gang di Arte Aruba ta na unda nos hobennan den diferente forma di expresion artistico ta demostra nan talento, amor y pasion pa arte y cultura en general. Masha hopi ta e hobennan ta participa nos por bisa un 1000 hoben ta logra participa durante cada edicion y e hobennan mes di nan propio interes y hopi motiva ta continua triunfando den arte y demostrando nan amor y pasion pa arte y cu danki na Gang di Arte cu ta yuda nan como un plataforma pa nan por sigui desaroya nan mes cu nan carera artistico na nivel profesional. Un ehempel reciente ta e hoben Kevin Gumbs cu a termina su estudio den arte di baile como docente, coreografo y bailado profesional na Hulanda e aña aki.
Gang di Arte Aruba a inspira hopi hoben cu actualmente nan ta continua den e desaroyo y caminda den e mundo artistico. Diferente porta y oportunidad a habri na unda nan por sigui amplia nan conocemento profesionalmente.
E meta y obhetivonan di e proyecto ta define caba y nos di Departamento di Cultura Aruba lo continua fortifica esaki pa medio di evaluacion segun cada edicion. Aña pa aña e competencia ta creciendo den interes y participacion cu ta algo hopi resaltante. E aña aki lo no ta un excepcion y lo continua cu e formato custumbra y ademas banda di esaki nos lo ofrece guia y acesoramento tecnico, preparatorio y profesional segun nan necesidad.
Gang di Arte ta e proyecto cu na 2007 a ser introduci pa prome biaha na Aruba.
El a ser presenta como djis un simpel competencia na unda e hobennan ta yega presenta den e competencia riba un anochi final so y di e resultadonan ta selecciona e grupo Ganado.
Mirando e interes y e importancia di e proyecto aki, na aña 2008, un aña cu a ser declara pa Gobierno di Aruba como aña di Cultura, a introduci un sistema nobo pa sigui desaroya e competencia aki y a opta pa haci e proyecto Festival Intercolegial di Expresion, Talento y Creatividad, combinando e metanan di e dos proyecto pa duna mas contenido y continua cu Gang di Arte. Tur esaki como resultado di su prome evaluacion.
Tabata na aña 2016, den e celebracion di e di 10 edicion di e competencia Gang di Arte, a ser introduci oficialmente e proyecto aki na scol y a habri bek un edicion special pa drenta scol di un forma mas activo pa promove e proyecto y talentonan nobo, stimula mas participacion y motiva e formacion di gruponan di tur tipo di arte den nan propio scol, promove e proyecto di tal manera cu e ta bira un Festival di Talento, Expresion y Creatividad. Y asina brinda na e competencia un oportunidad pa diferente scol por profila e talent di nan studiantenan.
E idea ta pa continua cu celebracion aki di un forma grandi, diferente, unico y energetico, na unda nos lo desea di mira un participacion masal, canando man den man cu docentenan di CKV di e diferente scol. Busca manera pa drenta cu mas poder y atencion pa duna balor na nan talento y na e metanan defini di e proyecto aki manera ta e origen inspirativo di e proyecto original conoci como: ‘Kunst Bende’ di Hulanda.
Meta:
E meta principal di e proyecto ta pa contribui, conhuntamente cu comunidad escolar, na e celebracion di e fiesta di mas gusta pa e hobennan conoci como:
‘Competencia Hubenil Gang di Arte’ p’asina por engrandece e celebracion mediante expresion, talento y creatividad.
Esaki ta ser elabora cu guia tecnico y patrocinio di Ministerio di Cultura, sosten di Ministerio di Educacion, Cabesantenan di scol, Maestronan di CKV y lidernan di gruponan artistico y cultural di nos comunidad pa celebra e fiesta di arte di mas grandi pa nos hobennan.
Obhetivo general:
E obhetivo general ta pa organisa un Festival Intercolegial di Expresion, Talento y Creatividad Gang di Arte cu e fin di crea interes y participacion di e comunidad estudiantil. Esaki lo ta un actividad artistico cu lo ser presenta den diferente forma, genero y expresion artistico pa medio di audicionnan na unda e hoben of grupo por demostra turn an potencial artistico y dominio di nan tecnica, tambe e vision artistico den e realisacion di un obra a base di un tema central.
E tema e aña aki ta ‘Caya’, Cultura Hubenil riba Caya. Caya como sinonimo di libertad di expresion, comunicacion y opinion den e cultura familiar, educativo y social. E obra artistico mester ta original y presenta a base di e tema ‘Caya’.
E aña aki Gang di Arte lo presenta su di 11 edicion cu lo tuma luga riba diahuebs 10 di Augustus den Cas di Cultura.
E disciplina cu por inscribi pa, ta Baile, Teatro, Arte di Palabra, Musica, Arte Visual y Audio Visual.
Pa participa ta completamente GRATIS.
E Ganado(nan) lo representa Aruba na diferente actividadnan cultural na Aruba y den Reino Hulandes.
Por inscribi ainda via formulario di inscripcion, via cada scol cerca docente di CKV. Tambe por busca formulario di inscripcion durante ora di oficina na Departamento di Cultura Aruba, situa na L.G. Smith Boulevard # 134 riba prome piso.. Por inscribi tambe via e-mail cu ta [email protected] of via pagina di facebook Gang di Arte Aruba. Bishita nos link. Por inscribi online via e link: https://form.jotform.co/62083856717868 of por tuma contacto cu Jhon Freddy Tobon Montoya, lider di e proyecto na: Cel. # 565-6903.
Cu e proyecto aki Departamento di Cultura Aruba ta sigui promove y percura pa e educacion di arte y cultura aki na Aruba. Biba nos Gang di Arte!
Cultura ta nos y nos ta cultura!