MEXICO CITY, Mexico – E candidato presidencial Republicano di Merca, Donald Trump, a reuni diaranson na mexico cu e presidente di e pais, Enrique Peña nieto.
Den un pronunciamento dilanti medionan tras e encuentro, Peña Nieto a bisa cu e conversacion cu Trump tabata hopi abierto y constructivo. “Nos tin cu traha pa e frontera ta mas eficiente y sigur,” Peña Nieto a señala. “Nos tin cu traha hunto pa e empleonan no ta bay di nos region.”
“Independientemente di e resultado di e eleccion, e proximo administracion por spera boluntad di Mexico pa haci e region mas sigur,” e presidente a manifesta.
“E Mexicanonan na Merca ta hende honesto y trahado y ta merece e respet di tur.” “Sr. Trump, mi prioridad ta protege e Mexicanonan unda cu nan por ta,” el a puntualisa.
E mandatario a bisa cu e ta spera pa reuni pronto cu Hillary Clinton y a sigura cu e ta respeta e proceso electoral na Merca.
Trump, di su banda, a sigura cu e encuentro tabata un conversacion constructivo di ideanan riba imigracion y intercambio comercial.
E candidato Republicano a bisa cu “e prosperidad y felicidad den ambos pais lo aumenta si nos traha hunto den 5 punto comparti”: frena imigracion, aumenta e siguridad di frontera – mi ta reitera cu ta necesario construi un muraya – desmantel e cartelnan di narcotrafico, actualisa TLC pa e dos nacionnan beneficia y cuida e industria manufactorero.
Trump a sigura cu no a toca e tema di kende tin cu paga pa e muraya. E candidato a bisa cu ta “e unico manera di tin un frontera sigura entre ambos pais.”
Mas laat, den un discurso riba politica imigratorio na Arizona, Trump a reitera su plan di construi e muraya y cu “Mexico lo paga 100%”.
No obstante e encuentro, Peña Nieto a tweet detaye riba e conversacion y a bisa cu a laga bon cla cu Mexico no lo paga pa e muraya.
Den un conversacion cu CNN en Español, e expresidente di Mexico, Vicente Fox, a bisa cu Trump no ta bon bini na Mexico.
Fox a sigura cu Donald Trump ta desespera pa gana voto. “E tin’e perdi, e aroz aki ya a cushina,” e ex mandatario Mexicano a bisa y a agrega cu e candidato Republicano ta un “wolf cu cuero di carne.”
Fuente: CNN en Español