WASHINGTON, D.C., Merca- E presidente di Merca, Donald Trump diaranson a hiba un combersacion telefonico cu su homologo Argentino, Mauricio Macri. Ambos a acorda “pa sigui traha pa yuda e hendenan di Venezuela pa restaura e democracia na nan pais”, segun White House a informa.
Trump y Macri a papia tambe di e relacion entre Merca y Argentina y “su compromiso pa aumenta e comercio y inversion” bilateral, según White House a indica.
E yamada telefonico a bin na momento di tension na Venezuela, unda oposicion a rechasa e resultadonan di eleccionnan regional di diadomingo ultimo. Chavismo a logra un victoria abrumador pero oposicion ta bisa cu e proceso tabata uno “fraudulento”.
Departamento di Estado di Merca, pa medio di su vocero Heather Nauert, dialuna a bisa cu e eleccionnan ey no tabata “ni liber” y “ni husto”. El a adverti di cu e lo sigui presiona gobierno di Nicolas Maduro.
Trump y Macri, dos empresario cu conoce otro ya pa decadanan largo, a reuni personalmente na White House na final di April y e biaha ey tambe nan a dedica pardi di nan combersacion na e situacion na Venezuela.