WASHINGTON, D.C., Merca – E Presidente Mericano, Donald Trump ta wak den e industria automotriz Europeo su siguiente obhetivo den e conflicto comercial cu Union Europeo.
Den un tweet, Trump a reacciona riba e invoerrechtenan riba productonan Mericano, cu EU a aproba. E tarifa halto ta ariba e.o. Juice di Cranberry y jeans como contesta ariba e invoerrechten ariba hero y aluminium.
No ta solamente Europa ta e obhetivo di e tarifanan halto di importacion di hero y aluminium, pero tambe China, Mexico y Canada. Cu esaki tambe, Merca a duna e señal di partida di e guerra comercial internacional.
“Si Europa no elimina e tarifa halto, nos lo pone un tarifa di 20% di invoerrechten ariba tur nan autonan cu ta bin Merca”, Trump a bisa.
Anteriormente Trump a bisa di un posibel aumento di e tarifa di importacion ariba autonan Europeo, na 25%.
E industria automotriz Aleman sigur lo ta un cu lo no ta nada contento cue decision di Trump. Merca ta un mercado importante di exportacion pa nan.