E truck nobo di Brandweer ta di fabricacion Rosenbauer, traha segun exigencia y specificacionnan di Aruba, segun Sr. Eduard de Cuba, Comandante di Cuerpo di Bombero.
Aruba ta e di tres isla den Caribe, cu tin e truck aki. Y esun di Aruba lo ta e unico den Caribe cu a haya e modelo aki y cu ta bin cu un tecnologia hopi avanza, y den ultima generacion. Su funcion ta di duna ayudo na e aerolineanan na aeropuerto den caso cu emergencia cu por presenta.
E ekipo novedoso aki ta traha riba e mesun exigencia y calidad rekeri en cuanto cantidad di awa y fond pero tambe su sistema lo ta mucho mas efectivo. Den tecnologia e ta mas avanza den comparacion cu e otronan.
Comandante di Brandweer ta splica cu awo cu e ekiponan aki, nan lo ta capaz pa atende cualkier situacion cu por a presenta na aeropuerto. E trucknan bieu cu ainda ta activo awor aki, ta yuda den esaki, pero tin un plan cu despues di tanto aña nan tambe mester wordo cambia door di e tempo di uzo y cu no ta haya e repuesto mas.
Un presupuesto lo ta den consideracion pa bin mas di e trucknan cu nunca lo ta mes cos cu un nobo, aunke afortunadamente e ekiponan aki no lo wordo uza con frecuencia pasobra nan funcion ta pa drenta den servicio ora un tragedia grandi, manera ora cu avion cay.
Mester tin e ekiponan aki den bon condicion y zorg pa nan keda optimal, segun Sr. Eduard de Cuba, comandante di Brandweer. Otro punto importante ta pa bay hunto cu desaroyo di aeropuerto, cual lo keda crece den structura pero tambe den cantidad di avionnan cu lo tin Aruba como destino, anto pesey pa Brandweer ta importante tene un ekipo di operacionnan optimal.