Despues di a permanece pa mas di 3 luna na Colombia, esaki pa un preparacion intensivo den un campo di entrenamento, e tri-atleta elite di Aruba, Renze Postma ta cla pa competi den e circuito di Camtri Triathlon America Cup na Salinas, Ecuador. Mester bisa cu Renze su entrenamento a bay sublime y ta contento di mira progreso den su desaroyo den tur tres disciplina. E ta sinti su mes bon y ta cla pa duna bon bataya contra e mihonan den e continente aki.
Aña pasa e atleta Postma a competi caba den e Camtri na Salinas unda el a haci un tremendo papel. Awo Renze a hiba un miho preparacion y lo wordo compaña pa su coach Nicolaas Robert. E biaha aki e trayectoria cu Renze mester cubri ta landa 1500m, core bicicleta 40 km y core na pia 10 km. E competencia lo bay ta uno fuerte unda e mihonan di henter mundo lo participa y Renze ta cla pa bataya contra e otro fuerte competidonan di USA, Peru, China, Guatemala, Brazil, Cuba, Namibia, Panama, Puerto Rico y Venezuela.
Luna pasa e atleta a gana e prestigioso galardon Premio Excelencia den Deporte unda el a wordo eligi pa di tres aña consecutivo Aruba su Atleta di Aña Local.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di Renze Postma pa e competencia di Camtri Triathlon America Cup na Salinas, Ecuador.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.