Recientemente e Copa Betico Croes den e deporte di tennis di mesa a wordo hunga na IBiSA San Nicolas unda nos hobennan a enfrenta otro den e categorianan U-11 y U-18. Mester bisa cu e bataya tabata uno fuerte den ambos categoria. Den e categoria U-11, e hoben Trevor van der Biezen a resulta e ganador mientras cu e rumannan Dylan de Leca y Brandon de Leca a resulta na di dos y di tres luga. Pa loke ta e e categoria U-18, aki e hoben Jeremy Ras a resulta e ganado mientras el a haya resistencia fuerte di e hobencita Joseline Boekhoudt kende a keda na di dos luga, mientras Jermaine Ras a ocupa e posicion number tres.
Mester bisa cu e deporte di tennis di mesa a crece den e ultimo añanan tanto pabou como pariba di brug. Mas y mas mucha y hoben ta cuminsa practica e deporte di raket y e federacion ta traha duro pa guia cada un den e bon desaroyo. Ya caba ta formando algun talento cu tin varios experiencia internacional. Den e siman aki mes e dos atletanan di tenis di mesa Jeandry Mathilda y Jean Claude Hoek lo representa Aruba den e Florida Orange Blossom Table Tennis Series na LakeLand, Florida. Un torneo grandi cu un total di 80 hungado rond Merca ta participa na dje. Pa nos atletanan di tennis di mesa esaki sigur ta un otro experiencia internacional mas y un bon chens pa midi nan nivel den comparicion cu otro atletanan prospecto internacional.
Un danki sigur na Lotto, e Loteria di Aruba pa medio di Comision di Subsidio cu a subsidia e torneo Copa Betico Croes di tennis di mesa na San Nicolas
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.