Joselin Croes cu ta un di e damanan cu a subi riba lista di e partido politico nobo. El a splica e motibo pakico el a dicidi pa esaki.
Manera ya indica, e lo bay participa den e proximo eleccion na 2017. El a wordo acerca pa hopi persona y el a enfrenta cu tres pregunta crucial cu ta e preguntanan cu tur hende lo kier contesta riba dje. Esaki ta locual Croes kier comparti tambe. E preguntanan ta: dicon drenta politica despues di casi 20 aña bek. Cu cua partido e lo bay. Awor e ta obvio y e pregunta pakico a scoge pa e partido ey y ki cambio Croes lo kier trece pa su pais.
E prome pregunta ta un fase p’e, pasobra e ta sali for di su curason. Dicon drenta politica awo, pasobra si e para, sigui sapatea, sigui rabia y zundra ora cu Gobierno tuma un decision, e no lo trece ningun cambio y esey ta berdad. Si nos tur dicidi di keda leu di politica, e ora mester gewoon acepta cu e dos partidonan grandi lo keda goberna nos pais y cu mester gewoon tuma e situacion manera e ta pasobra ningun ta bringando y drenta eyden pa trece un cambio.
Pa Croes e ta un tarea, e ta un trabao. E ta un persona di hopi fe y ta kere solemnemente cu Dios ta manda nos cada un riba nos pais pa cumpli cu un tarea. Nos tur tin un yamada y nos tin cu cumpli pa esaki. Pa Croes esaki ta cla. E ta sali for di henter su ser y su curason cu e por bisa cu e ta su yamada. Esaki ta locual cu su Dios a mand’e pa haci. El a sinti’e cu e ta asina fuerte cu no tin un duda den e decision cu el a tuma. Esaki ta e trabao cu e mester haci pa su pais, segun Croes.
Pesey el a dicidi tambe pa gara e toro na su cachonan y drenta e arena politico. Pasobra e kier por traha pa su pais. E kier pa bin cambio den forma pa hiba politica na Aruba. E cuenta di critica negativo, personal, esey ta spera di por cambia. E kier un confiansa den pueblo, hasta kisas trece cambio den Gobernacion vooral den cambio mester bin tambe den e forma di controla Gobernacion. Pasobra e stempel parlement cu tin awor ta un kiebre total den nos trias politica, cu tanto Croes como abogado ta kere den dje.
Pa Croes drenta politica, ta algo grandi. E ta haci’e cu amor y pasion. Pasobra e ta stima e pida baranca aki. E ta orguyoso di ta un Arubiano y e ta duel pa wak con su pais ta deteriorando. E ta duel Croes pa mira su hendenan ta pasando den duro y esaki ta e realidad. Realidad ta cu pais Aruba tin un debe asina grandi actualmente. Tur placa cu ta pagando y ta duna Gobierno na belasting, ta placa cu mester ta invirtiendo den nos hendenan, den un miho enseñansa, den un miho cuido medico di calidad. Den duna trabao na nos hobennan cu ta caba y esey mester ta nos prioridad.
Tambe Michella Steenvoorde-Lacle a splica dicon e ta drenta politica y kico ta su vision pa esaki.
Michella Steenvoorde-Lacle ta casa y ta mama. E ta boluntario y profesional. Desde cu e tabata den barica di su mama, el a maak mee politica por bisa. Di parti di su famia paternal y tambe e famia maternal.
Di parti di famia di su tata, e tabata tin un welo cu tabata diputado, Netty Lacle pa AVP. E tabata tin un omo di su tata cu tabata diputado, sr. Chai Lacle, kende awe ta bay tin un caya na su honor na Paradera ta bay wordo nombra. Tambe tabata tin un tanta, Mary Wever-Lacle, kende tabata minister di Enseñansa pa AVP.
Di parti materno, politica no ta algo nobo. Pasobra cu su difunto welo, Fichi Croes, caminda su lombrishi ta dera na Papilon, tabata Gezaghebber di Aruba. E tabata tambe su inicio tabata den AVP. A sali hunto cu Juancho Irausquin y a funda PPA. Despues el a sali for di PPA, hunto cu sr. Betico Croes, y a funda MEP y pa hopi tempo tabata consehero tambe di Betico Croes.
Tempo cu Steenvoorde tabata chikito, tabata tin un sala cu ningun di nan mag di drenta pasobra esey ta pa bishita so y ora e ta bin bishita su welo, e tabata purba di tende kico nan tabata papia di dje. For di e tempo ey caba, e simiya di politica a wordo planta den su ser.
Pa hopi aña cu el a neng’e. Por a presencia e parti positivo y negativo di drenta politica. Bo ta expone bo mes, bo famia, bo ideanan, bo persona na e publico. Kico ta e prijs cu lo bay paga pa esey, ta e pregunta. Sinembargo, tempo cu e tabata combersa cu sr. Otmar Oduber, el a realisa cu e ta cla pa un biento nobo. Laga e politica bieu atras y bin cu plannan concreto. E mester ta realisabel. E mester ta controlabel y tambe e plannan mester tin un plan cu un tempo specifico pa caba nan.
Steenvoorde ta un persona cu ta traha den enseñansa. En especial e pueblo di Noord, ta grita pa un scol nobo di MAVO/HAVO/VWO. Tin un necesidad grandi pa esey. Esey ta un di e motibonan cu Steenvoorde a join e plataforma, e forsa nobo aki, pasobra combersando cu Oduber, a realisa cu enseñansa ta prioridad number un di nos tur.
Jacky van Putten kende ta un hende conosi den e mundo di deporte, a splica dicon el a subi lista di e partido aki. Van Putten tey como un candidato riba e lista di e plataforma uni di e forsa nobo. Hopi hende na Aruba sa, e no ta desconoci den mundo di deporte. El a dedica su mes hopi aña den e mundo aki. Tur su tempo liber e ta dedica. P’e mester tin e prioridad pa ta un pueblo sano, pa asina por logra un unidad hunto y sano.
Segun van Putten, e ta casa cu Ponson, tin dos yiu y tin un nieta, cu e ta atende hopi cun’e. Na 1982, el a caba cu su estudio riba e tereno di deporte na Hulanda. Manera cu a regresa Aruba, el a bay cuminsa traha na un departamento di Gobierno cu ta dedica su mes na deporte, cu ta IDEFRE, cual ta actualmente IBISA. Na comienso di e aña aki el a bay ASU pa sostene cu proyectonan di deporte.
E pregunta ta awo, dicon van Putten a drenta politica.
Esaki tambe ta den su saner, manera cu Steenvoorde a menciona. El a nace, lanta den un ambiente politico y den su parti, hopi deporte. Su defunto tata, Roy van Putten, semper ta deal cu deporte. E ta lanta mainta, cla pa traha hunto y un tempo e tabata politico, hunto cu su rumannan, claba palo, claba bandera. E tabata pa van Putten, nada nobo. Su tata semper a apoy’e den deporte y esey ta pakico el a bay studia deporte tambe.
Na Aruba, Roy van Putten su lema tabata “mas deporte, menos vicio” y Jacky van Putten tabata puntra su mes kico e ta. Ora cu el a caba di studia y a bin bek Aruba, e ora el a realisa kico su tata Roy tabata kiermen cu esey. E tambe a dedica hopi na deporte.
Tempo cu Jacky van Putten a haya e oportunidad pa drenta riba e plataforma aki, el a mira cu esaki no ta nobo. El a mira su ruman y su tata pasa den politica y no tabata facil. El a papia cu su casa, yiunan y su rumannan wak kico nan ta pensa. Nan a bisa cu nan sa cu stima e deporte y locual ta pasando ultimo tempo a hurt van Putten. Pesey awe, van Putten ta sinta hunto cu e demas damanan pa hisa e deporte bek na unda e mester ta.
Mester dedica nos mes bek na e pueblo, e hubentud pa e deporte. E clubnan, organisacionnan, tur mester di atencion bek y no mester lubida e boluntarionan. Ta hendenan cu mester den e comunidad aki. Hopi di nan no tin placa pa profesionalismo, pero si tin e boluntarionan y upgrade nan, no tin nada mas bunita. Pesey, segun van Putten, mester bin bek cu deporte como central. Manera su tata a bisa semper “mas deporte, menos vicio.”