STOCKHOLM, Suecia – Cientificonan di origen Britanico, David Thouless, Duncan Haldane y Michael Kosterlitz, a gana diamars e premio Nobel di Fisica pa revela e secretonan di materia exotico cu por contribui na mehora materialnan pa electronica of computernan cuantico.
E Academia Real Sueco di Ciencia a reconoce su “descubrimentonan teorico riba transicionnan di fase topologico y fasenan topologico di materia.” Topologia ta un ramo di matematica cu ta describi e propiedadnan di obhetonan.
Su investigacionnan den decadanan di 1970 y 1980 a habri porta na un mundo antes desconoci unda cu materia adopta of den fasenan inusual, e academia a agrega.
“Su descubrimentonan a tuma luga den avancenan grandi den e comprension teorico di misterionan di e materia y a crea perspectivanan nobo den e desaroyo di materialnan innovador,” nan a agrega.
Ta existi e speransa cu “materialnan topologico ta resulta util pa generacionnan nobo di electronica y superconductor of den futuro computernan cuantico,” academia a bisa.
Huesnan di Nobel sa premia descubrimentonan realisa decadanan prome pa sigura cu e ta soporta e paso di tempo.
Thouless, di 82 aña, ta profesor emerito di Universidad di Washington. Haldane, di 65, ta profesor di fisica den e Universidad di Princeton na New Jersey. Kosterlitz, di 73 aña, ta profesor di fisica na e Universidad Brown na Providence, Rhode island.
Den un intervencion telefonico durante un conferencia di prensa na Stockholm, Haldane a bisa di ta “hopi sorprendi y hopi satisfecho” pa e premio y a añadi cu e premiadonan a realisa su descubrimentonan un poco pa casualidad.
Kosterlitz, di dobel nacionalidad Britanico y Mericano, a bisa cu el a ricibi e noticia ora cu el a bay lunch na Helsinki, unda e ta profesor invita na e Universidad di Aalto.
“Mi ta un poco deslumbra. Mi ta purba di haci cargo,” el a bisa na Associated Press.
Mientras mayoria di hende conoce obhetonan di tres dimension, e premiadonan a analisa materialnan asina fini cu nan tin dos dimension of incluso uno.
Kosterlitz y Thouless a demostra contra lo previsto cu materialnan bidimensional por conduci na electricidad sin perdida pa resistencia. E propiedad aki yama superconductividad.
Diaranson lo anuncia e ganado di premio di Kimica. Diabierna lo haya sa kende a gana e Nobel di paz, mientras cu e galadronadonan den categoria di Economia y Literatura lo ta conoci e siman cu ta bin.
Cada premio ta balora na 8 miyon di corona (930 mil dollar). E vencedornan ta ricibi ademas di un medaya y un diploma durante e ceremonia di entrega di premio cu lo wordo celebra dia 10 di December, durante aniversario di morto na 1896 di e fundado di e reconocimentonan, Alfred Nobel.
Fuente: Associated Press