Tres mucha muhe adolescente a wordo deteni na Zeeland pa a post potretnan sunu di muchanan di scolnan secundario for di varios parti di e provincia. Esaki a wordo haci cu un account di Instagram, pa cual tabata reina un ambiente tenso e ultimo simannan na scolnan di e provincia. E cuenta entre tanto a wordo cera.
Diamars mainta trempan dos mucha muhe di 15 y 16 aña respectivamente a wordo deteni na nan cas. Nan telefon celular y nan laptop a wordo tuma den beslag y for di informacionnan eyriba, a bin haya sa cu un otro mucha muhe di 16 aña tambe tabata envolvi. E tambe a wordo aresta mientras tanto.
E tresnan aki ta wordo sospecha di spreid potretnan suno como tambe videonan sunu, pero tambe di ta publica potret nan cu a wordo photoshopped, cu imagennan di curpanan cu mal formacion cu cabes di nan compañeranan di scol.
Seis victima di entre 15 y 18 aña a entrega keho na polis. Un mucha muhe su video a wordo gepost riba Instagram, di cual e mes tabata keriendo cu e film ey a disparce for di internet.
E investigacion ta dirigi su mes na prome instante ariba e seis denuncianan, pero segun polis nan a haya mas material.
For di investigacion di e telefon y laptopnan di e tres mucha muhenan, polis por a deduci cu nan tabata conoce algun di e victimanan y otronan a wordo gekies arbitrariamente.