Un transformacion altamente anticipa ta wordo divulga e diahuebs anochi aki. Despues di mas cu un aña trahando riba loke mester bira e evolucion di e programa di television, e desaroyador, productor ehecutivo y presentadora di e programa responsabel pa e reportahe semanal di “trend” ta anuncia cu e ta cla. “Tabata hopi trabao, cu un cantidad di detaye.
Esfuerso di un team pa e producto y servicio ta di e calidad superior. Nos a traha duro pa por estrena nos look nobo, nos asina yama re-branding y e era nobo di ‘Trend Alert’ awe”, asina Tessa Pietersz a elabora referiendo na e pakete nobo cu e programa semanal aki awor a agrega na su portfolio di servicio.
“Nos ta sigui raporta trend den tur genero, pero awor banda di tin e reportahenan aki riba ATV Canal-15, nos lo reenforsa nos producto cu cobertura radial, un plataforma nobo via media social y trendalerttoday.com unda cu e viewer por sigui e trend ‘on demand’.” Pero esey no ta e noticia di mas grandi. Loke tin comerciantenan, expertonan di mercadeo, ademas di e trend aficionadonan mas entusiasma ta e online platform cu su search-engine cu nan lo ta lansando pronto riba cual e usuario por busca tur sorto di trend for di e comodidad di su computer, tablet of smartphone.
“Y e search lo bay ta total. Bo lo por busca cualkier cos cu bo ta interesa di haya. For di un articulo di moda en particular, pa un early-bird dinner of un curso di maneho empresarial. ‘Trend Alert’ ta bay yuda hasta bo localisa un producto riba e mercado local cu bo por a wak riba un celebridad internacional. Y ey ta caminda cu nos ta sinti y anticipa cu e demanda pronto lo ta!”
‘Trend Alert’ ta den su di 12 aña. Dia cu el a nace, e tabata e proyecto mas innovador den media. Algo totalmente desconoci pa television. Su popularidad inmediato y su consistencia durante tanto aña a mustra cu el a sirbi su proposito. E produccion di un calidad halto y entretenido a garantisa cu ‘Trend Alert’ a bira un “household name” den e comunidad, cu un posicion stabiel entre televidentenan. Despues di tanto aña, Tessa Pietersz a sinti cu e tempo a yega pa re-inventa su formato y concepto un biaha mas, segun e demanda di e retonan moderno.
‘Trend Alert’ ta bay den aire tur diahuebs 8:30pm na ATV. Check nan Facebook page @Trend Alert Today pa detaye di su multi-media platform.