Diadomingo ultimo, dia 8 di juli, tabata un mainta di hopi accion ora cu e karatekanan di diferente scol di karate a topa otro na Centro Deportivo Betico Croes pa participa na e ‘Vacation Kickoff Training 2018’.
E ‘vacation kickoff training 2018’ a wordo duna door di Sensei Anthony Geerman, headcoach di Aruba Karate Bond, kende a comparti su conocemento di karate na un forma fenomenal.
E mainta a habri cu un palabra di bon bini di parti di Sensei Anthony Geerman y señora Desiree Thodé-Helder (vice – presidente di Aruba Karate Bond) pa asina splica tur presente cu Aruba Karate Bond tin como meta pa sigui motiva, stimula y guia e karatekanan na Aruba pa un nivel mas halto, segun e norma y balornan di e arte di karate.
Despues di un sesion di calentamiento, Sensei Anthony Geerman hunto cu Sensei Alberto Gonzalez Lujan a anima e karatekanan durante henter e mainta, saliendo for di un ehercicio pa otro cual a haci e entrenamento aki un experiencia inolvidabel. Hopi great tabata pa wak ora cu a yama Sensei Luis Escalona durante di e entrenamiento pa e mustra e karatekanan con pa haci e ehercicionan corecto pero mas aun pa stimula nan pa sigui cu e entrenamento.
Na final di e entrenamento, Sensei Anthony Geerman a gradici tur karateka pa nan participacion na e training. Aruba Karate Bond ta tuma e oportunidad pa gradici tur karateka, tur mayor, tur instructor y tur boluntario pa nan aporte.
Un danki special ta bay pa Comite Olimpico Aruba (COA), Aruba Sport Unie (ASU), Stichting Sportsubsidie Aruba (SSA) y Lotto pa Deporte cu ta sostene karate na Aruba. Pa cualkier informacion y pa aplica pa bira miembro di Aruba Karate Bond, por comunica cu Sensei Felix Tromp of señora Janina Werleman na [email protected]