Counter Trafficking Taskforce Aruba cu cooperacion di Amsterdam Manor Beach Resort, De Palm Tours, La Quinta Beach Resort, Cuerpo Policial, CEDE Aruba y Aruba Marriot Resort, lo organisa den e siman di 12 te 18 di oktober venidero, training di conscientisacion unda e focus lo ta riba traficacion di hende (mensenhandel). Enfasis den e training lo ta con pa reconoce e señalnan di traficacion di persona y kico por haci en caso.
Trainer lo ta e conocido Shamere Mc Kenzie, cu tawata un victima di traficacion di hende su mes, y na fin di 2016 a duna e prome training na Aruba. E aña aki e lo bay enfoca mas specifico riba training pa law enforcement (KPA) y personal di hotels y touring operators. Den e training Shamere lo conta su mes un storia di traficacion di hende pa asina purba di preveni casonan di traficacion den futuro. Despues Shamere lo duna un training special pa personal di Red Cross Aruba riba e peliger pa traficacion di hende (mucha) ora di un desaster manera e horcanan den Caribe.
Riba 18 di october 2017, e dia nacional contra traficacion de hende, Shamere lo cera e siman cu un presentacion na Cas di Cultura pa 500 examenkandidaten di Colegio Arubano, enfocando special riba e peligronan cu un studiante por confronta ora nan sigui nan estudio na Europa of USA.
Shamere Mc Kenzie actualmente ta traha na Salvation Army of Central Maryland (USA) como Anti-trafficking Program Director y ta conoci pa su speechnan y training riba e tereno di traficacion di hende.