Dialuna merdia a tuma luga un conferencia di prensa yama pa DOW na unda a duna di conoce ken ta e compania cu lo bay cuminsa cu e proyecto di Watty Vos Boulevard. Segun director di DOW, Marlon Croes, cu nan a cuminsa cu trabaonan organisatorio diabierna y diasabra cu a pasa riba Watty Vos Boulevard, miho conoci como Ringweg3. E tabata un proyecto cu tabata tin basta den planning. Generacionnan prome cu tabata traha na DOW a planea e trabao aki mas of menos un 40 pa 50 aña pasa. Tabata tin hopi obstaculo pa por a yega pa por cuminsa cu e proyecto. Un di e obstaculonan grandi tabata e adkisicion di e terenonan. Tambe con lo bay trah’e. Y tambe e parti financiero, con e lo bay wordo financia.
Pero a yega asina leu, despues di a topa cu e modelo di PPP (Public Private Partnership), unda cu na 2010, Gobierno, despues di a haya conseho di DOW y a busca sosten di Rijkswaterstaat, Hulanda y tambe busca su transaction advisor, cu den e caso aki tabata un independiente for di sector priva, cu a bin den e proceso pa por garantisa e transparencia, integridad y obyectividad di e proyecto. Despues di un destaho publico cu concurentiegericht dialoog, a sali afo cu MOTA-ENGIL ta e compania cu a wordo apunta pa haci e trabao aki.
MOTA-ENGIL a acepta e reto di traha e PPP aki, via di e DBFM Contractor, unda cu tur e riesgonan ta wordo traspasa pa sector priva. Recientemente, dia 23 di Februari pat a exacto, a yega na un financial close na New York, y consecuentemente trabaonan a tuma luga den e parti di preparacion y awor aki e trabaonan a cuminsa por fin. No ta un proyecto cu ta bisa di traha pa traha, pero e coleganan prome, a visualisa e tempo ey caba e crecemento di Aruba. Aruba a crece desde 1986 den poblacion, di 60 mil hende pa 110 mil hende y e cantidad di auto, e car ownershipnan cu tin na Aruba, tambe a crece for di 1989, cual tabata 23 mil auto, a bay pa 75 pa 77 mil auto awendia, segun Marlon Croes.
E crecemento di mas auto na Aruba ta trece cun’e e reto di caretera cu mester duna su atencion pa cual a yega e ora pa trece e proyecto di Watty Vos Boulevard cu tin hopi aña ta wardando pa cuminsa, segun Croes.
Na cada residencia, na cada cas di famia, tin por lo menos 2 pa 3 auto para sigur. Tur esakinan ta trece cun’e cu tin hopi fluho di trafico cu ta wordo genera di punta A pa punta B, pa mantene bida social.
Bisando esaki, tur a conoce den e ultimo añanan, diferente congestion ta tumando luga. E congestion aki ta trece cun’e iritacion. Pa bay trabao, vooral for di e parti p’ariba di isla di Aruba, cu ta bay direccion di hotelnan. Unico caminda pa pasa, ta e caminda di Smith Boulevard cu tin y esaki ta pega grandemente. Ta haya e ruta cu crecemento den aña di mas trafico, ta bay uza Kibaima Tanki Flip, cu tambe ta pega a base diario. Awor aki nan a move un tiki mas abao y ta bay pa e caminda cu ta core di Jaburibari, Calabas, Kudawecha, Sabana Liber, pa nan yega pa e area di Noord tambe.
Bisando esey, cu tur nos camindanan ta birando congestiona door di desaroyo cu a pasa cun’e. A propone pa traha e Ringweg 3, via un PPP y a yega asina leu cu e PPP aki, ta bay encera cu ta bay ta un 4lane, for di aeropuerto, pasando Infragebouw, for di e rotonde dilanti FCCA, bay direccion Ex-Codemsa, drenta, pasa pariba di San Barbola, drenta Sero Patrishi, pasa Tanki Leendert, Ponton, Bushiri y bay cay riba e cruzada di Punta Bravo, unda cu Sun Plaza/Guardian Life ta.
Esey ta e 4 lane cu ta bay wordo construi. Manera cu a menciona den varios ocasion, Watty Vos Boulevard, no ta encera esey so. E ta encera tambe e rotonde di Caya Ernesto Petronia, bay direccion di cruzada di Noord, unda cu e cruzada aki lo bay converti den un rotonde. E cruzada di Fermin’s Bar lo bay bira un rotonde, y asina embeyese full e ader aki, cu ta e caya Ernesto Petronia, bay den Caya Frans Figaroa.