Aña 2017 sigur tin 3 luna caba cu e pista di Palo Marga no a mira mucho accion y coredornan a cuminsa bira un tiki desespera pa kico lo bay bira e futuro di e deporte pero principalmente di nan inversionnan haci den nan vehiculonan di drag. Pa e motibo aki siman pasa a pidi pa un reunion di coredo unda mas di 100 driver y doño di auto y brommer a presenta na Club Trappers, pa asina dicidi kico lo por ta miho pa e pista di Palo Marga y e deporte di drag. For di e reunion aki a sali un mandato cla y raspa pa reactiva e grupo di The Revival of Palo Marga cu na final di 2015 a organisa 2 evento grandi y sumamente exitoso na Palo Marga y a logra genera mayoria di e fondonan necesario pa asina cumpra e timing system nobo pa e pista. A base di un votacion di e coredoranan presente cu a registra na entrada a sali di biaha un peticion na e beheerder di Palo Marga pasa e operacion di Palo Marga pa loke ta trata e aña 2017 na e organisacion di The Revival of Palo Marga 2 y a duna e grupo aki un termino di 2 siman pa asina nan por informa e coredonan bek di nan plan di accion. Durante weekend mes ora a start e proceso di inventarisacion na Palo Marga pa asina den un termino relativamente corto por cuminsa reactiva e deporte di drag aki na Aruba. E startup aki lo no ta uno facil pero e team aki ta determina pa haci esaki un realidad den un tempo record y tambe cu e mesun transparencia financiero cu nan a traha cun’e na 2015 pa asina e deporte di drag y vooral e facilidadnan di Palo Marga por conoce un adelanto substancial den 2017. Pues bon noticia sigur pa e deporte di drag y ta di spera cu prome cu e fin di siman aki lo por tin un anuncio di ki dia e prome actividadnan di drag lo start sali riba e pista di Palo Marga International Raceway Park, mientras cu diasabra awor caba lo cuminsa cu trabaonan di limpiesa y restructuracion pa asina pone e facilidad den condicion pa cuminsa ricibi bishitantenan.