Pa loke ta e trabaonan haci den Havenstraat, Sr. Ing. Marlon Croes, director di DOW a splica di e trabaonan cu a wordo haci pa asina preveni cu algo asina bolbe sosode den futuro.
Den caso di Havenstraat ta cu, el a wordo traha pero tabata tin un riolering cu a sufri daño y esey ta haci cu e ta cuminsa basha awa den e fundeshi di e caretera. Y e fundeshi a bira instabil pa cual motibo e klinkernan y e asfalt ta move.
Pero e matanan, cu ta bunitesa band’i caminda, e palmanan ta wordo iriga. E cantidad di awa ta pasa bou di e banchi, drenta den e fundeshi cu ta haci’e no stabiel. A drecha e irigacion pa e cantidad di awa cu ta wordo duna. Pero a drecha e fundeshi, cu otro tipo di material. A stabilisa esaki cu un “flower fill”, santo combina cu cement. E ta haci e fundeshi mas duro, mas stabiel cu ta preveni esaki den futuro.
No ta intencion cu ta bay stroba trafico y e minister ta desea pa haci e trabaonan di anochi. Y lo duna contenido na esaki. Ora di traha anochi, tin menos molester pa e publico. Tin menos trafico na e oranan ey. E productividad lo ta mas halto, ya cu tin menos problema di solo, menos cansancio. Lo mester bay e organisacion, aki aya. DOW ya caba tin experiencia caba cu ta traha anochi, pero esaki mester mehora. Esaki ta conta tambe pa e contratistanan cu lo traha cu DOW tambe.
OTRO HORARIO
Den e caso aki,. segun Sr. Croes, a keda palabra cu ora ta traha anochi, no ta traha den dia. E shift ta cambia. No tin overtime, pero ta duna un toelage pa a traha anochi. Lo mester bin adaptacionnan den nan documentonan cu ta participa cu DOW den nan proyectonan binidero, cu nan lo mester tene cuenta cun’e.
Por ultimo, minister Oduber, cierto momento Aruba mester cambia di mentalidad. Ora cu tin empleadonan publico cu ta traha anochi, ta mas na su luga pa dunanan un toelage. Esaki lo ta bay costa un poco mas, pero a cambio economia di Aruba lo gana dies biaha mas hopi cu loke a perde di gana pa caha di gobierno.