Dialuna 9 October ta celebra di Bombero y ta recorda Dia di San Florian, e santo patrono di Bomberonan. Door di esaki ta para keto un rato na e trabao, kico nan ta haci, con ta haci esaki. tambe e dedicacion cu cada un cu ta haci e trabao aki mester tin, pa asina eherce un trabao asina importante pa comunidad, cu eigenlijk bo para keto na dje, ta rekeri hopi sacrificio. Sr. Eduard de Cuba, Comandante di Bombero ta amplia mas ariba esaki.
No solamente di Bombero, of e Cuerpo di Bombero, pero full e famia. Mama, tata, yiu y casa di e bombero, cu ta entrega nan ser keri n e Cuerpo di Bombero, pa nan forma un grupo cu ta yuda den tur momento, na cualke un incidente, un calamidad, e Bombero t’ey eynan para pa sirbi pueblo.
Esey ta pone un persona pensa tambe, di cuanto balor e trabao tin. Cuanto sacrificio e bombero ta haci pa eherce e trabao aki. Sr. Eduard de Cuba ta gradici su coleganan bombero cu ta dedica mayoria di nan tempo, 24 ora pa dia, 7 dia pa siman ta dedica nan na e trabao. No por laga afo, tur esunnan cu ya no t’ey mas, esunnan cu a baha cu pensioen ya cu nan den nan momento a zorg pa e Cuerpo di Bombero luci y haci un bon trabao, unda cu nan a bay.
Comandante di Bombero a sigui bisa cu ultimo añanan, nan a bay hopi dilanti, pero ainda nan no ta unda cu nan kier ta. Nan ta wardando candidatonan nobo drenta, pa reforsa e Cuerpo. Nan tin aworaki 5 officier nobo, Sr. Ponson y Sr. Tromp a bin dos aña pasa. Awo tin Werleman, Eduardo y Andrade cu a caba nan officiersopleiding luna pasa. Nan tin un team hopi jong den e staf di Cuerpo di Bombero, cu ta hopi energetico y cu hopi gana di traha tambe. Esey ta un bon logro.
Awo lo busca pa reforsa e Cuerpo mes di hendenan, e bomberonan ariba e trucknan, cu ta haci e trabao ariba caya. Esey ta loke e Cuerpo kier pa bay dilanti y sigui cu nan. Nan a haya caba e ok di gobierno seis luna pasa, unda lo bay ofrece les y examennan nobo, den sentido cu nan diploma awo lo bira uno reconoci den full Reino Hulandes, dus tur e islanan di ex- Antiyas y tambe Hulanda. Esey ta pone cu nan ta haya mas balor den nan educacion profesional como bombero, segun Comandante di Bombero, Sr. Eduard de Cuba.