Un total di 17 scol di e zona di Orlando ta cera como medida preventivo, mientras autoridadnan ta den un operacion masivo buscando e supuesto autor di un atake riba un agente policial na Orlando.
Un oficial di polis di Orlando a ricibi un tiro dialuna mainta y e sospechoso a huy despues di esaki. Horanan despues a drenta e informe cu e agente policial a fayece.
E agente policial a wordo identifica como Debra Clayton, casa cu dos yiu.
“Debra Clayton tabata profundamente comprometi cu nos hubentud y cu e comunidad. El a haci hopi proyecto, el a organisa marchanan contra violencia. E tabata un heroina y el a entrega su bida, protegiendo e comunidad cu tanto e tabata stima. Nos lo haya su falta hopi”, segun Cuerpo Policial.
Un di dos agente policial a muri a causa di e heridanan di bala durante e persecucion di e sospechoso, segun autoridadnan a confirma. El a wordo transporta pa un hospital unda el a wordo declara morto. Su identidad ainda no a wordo revela. Mas detaye no ta conoci.
E buskeda ta sigui.