Torneo HEINEKEN fast pitch Femenino di Aruba Softball Bond a yega su final unda a bay over mesora pa entrega premio na esnan cu a destaca. Manera ta conoci den luna di November a inicia un torneo di fast pitch pa asina brinda oportunidad na nos atletanan femenino pa bataya contra otro prome cu fin di aña. Alabes ASB a uza e torneo aki como base pa por mira su atletanan mas di acerca en bista pa traha un pre seleccion pronto kendenan lo cuminsa cu entrenamento manera cu aña habri pa bay busca clasificasion pa Juegos Centro Americano y Del Caribe mey mey den aña. Despues di dos buelta e ekipo di Jaguars ta derota Aruba Bank Lady Tigers 3-2 den e ultimo wega y ta bay cu e titulo maximo cu 6 victoria y 0 derota pa cera aña 2016. Riba potretnan adhunto por aprecia momento cu Rudlyn Ras ta ricibi tanto premio como sub campeon pa Aruba Bank y tambe un bunita recuerdo como muestra di a competi den dicho torneo. Despues Melissah Daniel di Jaguars kende a lansa e ultimo wega completo a ricibi un premio como e MVP. Rayborn Didder manager di Jaguars hunto cu su ekipo a ricibi e trofeo maximo. Tanki Leendert Girls di Rubia Ras y e ekipo hoben esta Rebels di Waika Maduro tambe a ricibi un recuerdo pa nan participacion. Aruba Softball Bond ta contento cu cooperacion di tur ekipo cu a haci nan esfuerso pa cumpli cu e schedule diferente dia tras di otro y asina bataya pa e titulo. Pabien na tur dirigente, tur lider di ekipo, tur atleta y mas cu claro un danki na Dragon Hitters pa prepara su tereno y alabes Subsidie Commisse pa nan aporte. Deporte di softball den pleno desaroyo.