ALEXANDRIA, Virginia – Varios persona a resulta herida, entre nan e congresista Republicano Steve Scalise, durante un tiroteo cu a sosode diaranson na Alexandria, Virginia, pafo di Washington.
E tiroteo a tuma luga, segun informacionnan preliminar, durante un practica di baseball di miembronan di e partido Republicano.
Polis di Alexandria a anuncia cu e heridonan a wordo transporta na e hospitalnan. Ademas, e actividadnan den e Capitolio a wordo cancela of retrasa debi na e tiroteo. Algun medionan Mericano a informa cu e congresista Roger Williams a wordo herida den e incidente, sin embargo, e version ey a wordo desmenti den un comunicado cu e despacho di Williams a emiti.
E informe, cu a wordo comparti riba su cuenta di Twitter, a aclarea cu e “congresista Williams no a wordo tira” pero si un miembro di su ekipo.
E departamento di polis di Virginia a indica riba nan cuenta cu nan a dirigi pa e escena tras e reporte di un tirador.
Polis di Alexandria, na algun kilometer di e capital, na Virginia, a indica cu “e tirador a wordo probablemente aresta.” “E heridonan a wordo transporta pa un hospital,” di acuerdo cu e agencia AFP cu a cita fuentenan policial.
E legislador republicano Mo Brooks, tabata presente na e luga na mmento di e tiroteo y a relata na medionan local cu, ademas di Scalise, ta kere cu tin por lo menos otro cuater herido, aparentemente asesornan di e congresista y personal di siguridad.
Scalise ta e di tercer Republicano di mayor rango di e Camara di Representante di Merca, di acuerdo cu EFE.
Di acuerod cu Brooks, e autor di e tiroteo tabata tin un rifle semiautomatico y a tira decenas di biaha.
Ademas, un ayudante di e Congreso a bisa cu Scalise ta den condicion stabil den e Hospital Universitario George Washington.
E autor di e tiroteo a wordo reduci pa e autoridadnan y ta den custodia, di acuerdo cu e informacionnan preliminar, segun e agencia EFE. Segun testigonan a informa, e tirador lo ta un homber color cla.
Fuente: www.ntn24.com