HOUSTON, Merca- E comisario di e condado di Harris, Ed Gonzales, a informa prensa cu tin al menos 8 morto den un tiroteo den un scol secundario na Santa Fe, Texas. El a agrega cu’n studiante di 17 aña a wordo aresta como sospechos. Ta papia di varios herido.
“Tin varios morto. E por ta di ocho te cu dies, di cual mayoria ta studiante”, Gonzales a agrega.
E Distrito Escolar Independiente di Santa Fe, Texas, a informa a trabes di su cuenta di Twitter cu “a haya varios artefacto explosivo den e scol y areanan cercano di e scol”. E districto escolar a sigui bisa cu agencianan manera FBI, ATF y e Departamento di Seguridad Publico di Texas ta na e luga di e incidente dunando nan apoyo na e luga.
E comisario a precisa riba su cuenta di Twitter cu “e no ta un situacion activo mas” y “e personal ta dunando prome asistencia na e heridonan”.
E presidente di Merca, Donald Trump, a reacciona a trabes di su cuenta di Twitter cu’n video unda cu e ta bisa cu “nos ta lamenta e teribel perdida di vida, y nos ta manda nos apoyo na tur esunnan afecta pa e teribel atake na Texas. Na e studiantenan, famia, docente y personal di e scol secundario Santa Fe, nos ta cu boso den e momentonan tragico aki y nos ta cu boso semper”.
Medionan local a mustra e ekipo di otro agencianan tambe na e luga. Un testigo a conta na e cadena di television ABC 13 cu ‘n homber a drenta y a tira un studiante den pia durante e echonan.
“Nos ta pensa cu tabata un training di candela na cuminsamento, pero en realidad e maestro a bisa” boso cuminsa core”, un studiante a bisa durante un entrevista den un television.
Santa Fe ta un ciudad di mas o menos 13 mil habitante y ubica na 48 km zuidoost di Houston.
Fuente: NTN24