Tur cos cu ta pasando den caya grandi no ta un cos so, sino e tin di haber cu hopi mas cos segun miembro di directiva di KVK, Sr. Omar Tromp a splica.
E problematica di Caya Grandi ta di diferente nivel, cu ta hungando un rol ya pa par di aña caba, y no ta di awo. E asunto di Aruparking tambe a bin erbij y awo ta investigando ki influencia esey tin ariba caya grandi. Un par di aña pasa Gobierno a dicidi di embeyece Caya Grandi y esaki a bin cu tardansa y esaki tabata tin su influencia pa cual hopi negoshi a dicidi di bandona caya grandi.
E-commerce, of online shopping tambe tin su influencia den caya, den loke ta wordo ofreci den caya. Mas aleu tambe ta haya e mallnan cu ta lanta mane paddestoel p’afo di caya. Ta bon pa para keto un rato y defini kico ta caya grandi. Si ta e caya principal so, of e zijstraatnan tambe. Esey mester wordo defini ainda. Pero si e mallnan p’afo di Oranjestad ta hungando un rol grandi, y hopi di nan toch ta keda bashi. Ta keda e pregunta si Aruba tin e mercado pa sostene tanto mallnan asina. Mester para un rato akinan y pensa kico ta haci cu esaki.
Sr. Tromp ta sigui splica cu kisas lo mester bin un ley di zoning, cu ta bisa unda si y unda no por bin tipo di centro comercialnan aki, por ta trece un solucion. Of mercado mes lo tuma su curso y hopi di e mallnan aki lo por te hasta cera. Si wak bon, tin mallnan pabao bandi hotel cu riba cierto ta bashi. Atrobe ta bin e pregunta, si Aruba tin e mercado grandi pa carga e mallnan aki.
Sigur e tema di zoning lo ta algo pa papia riba dje den un futuro cercano. Un cos cu a bin acerca ta e Aruparking. Segun Sr. Tromp, e implementacion di esaki no a bay na e miho manera. Kisas esaki ta un punto cu a haci e situacion den caya grandi pio, y esaki lo mester check cu personanan cu ta traha den caya grandi. Dicon a implementa Aruparking, esey ta un influencia grandi pa loke a pasa cu Caya y esaki a haci cu mas negoshi a bay atras den benta.
Tin hende ta bisa cu nan no ta paga pa para den caya, no ta cuestion di e cuanto, pero ta cuestion di dicon el a wordo implementa y kico ta su consecuencianan pa den caya, segun Sr. Omar Tromp, miembro di directiva di KvK.
Camara di Comercio ta boga pa tur hende sinta hunto y ban busca un solucion pa asina biba nos centro di Oranjestad y specialmente Caya Grandi, segun Sr. Tromp. Esaki ta pa mantene e negoshinan cu ta den Caya aworaki habri y riba termino largo, wak con ta soluciona y trece bida bek den Caya. Aworaki Caya Grandi den oranan di anochi ta practicamente morto.
Por pensa riba zoning cu kisas lo por wanta e desaroyo pafo di Caya, trece mas F&B den caya, dus restaurant, terrasnan cu por trece mas ambiente den caya den oranan anochi. Hasta por laga hendenan biba den Caya Grandi, den sentido di laga hendenan biba ariba e parti ariba di pacusnan. ‘
Pero mester explora tambe e motibo pakico nos hendenan no ta bayendo den caya y tambe tackle e situacion pa trece bida bek den Oranjestad.
Den un di e puntonan cu KVK a haya for di ODA (Oranjestad Downtown Association) ta zoning, manera ya menciona. Tambe nan ta splica cu e mercado di Venezuela a cay drasticamente, toch tin su influencia riba bida den caya. Un otro punto di dolor ta e online shopping. Por ultimo, incentivonan fiscal cu por wanta e negoshinan habri aworaki den caya habri. Incentivonan fiscal manera reduci grondbelasting, baha e huur di e gebouw. Tur esaki ta pa haci Caya Grandi atractivo bek. Aworaki tin hopi planesnan riba mesa, pero mester sinta hunto.
Por ultimo, Sr. Omar Tromp a splica cu no mester warda aki un aña despues di eleccion pa sinta hunto y pensa con pa rebiba Caya Grandi, pero traha awo pa Caya Grandi no bira un ghosttown.