E incidente fatal di siman pasa dialuna merdia, unda un baby di casi 2 luna a fayece, sigur ta trece conmocion y tristesa den henter comunidad.
Na mesun momento, e suceso aki ta pone uno realisa cu tin trabou urgente pa haci pa loke ta trata implementacion di ley di “kinderopvang”. Despues di mas di 20 aña, unda cu tin un averahe di 95% di nos muchanan di 0-4 aña na crèche segun un investigacion haci pa Rosalin Kock na 1996 pa su masteropleiding, te na juni 2017 finalmente a logra pasa un Landsverordening tocante e reglanan pa garantia y promocion di calidad den crèche.
Nivel di e guianan di crèche
Mas cu claro, cada crèche ta percura pa nan tin e miho guianan y ta haci tur posibel pa garantisa un bon cuido na e muchanan. Sinembargo e nivel di exigencia pa un guia ta minimo un LBO of tin hasta caso unda nan no tin ni esey. Esaki ta asina, door cu no tin regla y ley hancra y den funcion, cu por haci control regular riba e nivel di educacion di e guianan. Mester bisa acerca si, cu varios ta haci e trabou cu hopi amor y dedicacion, pero semper ta miho pa nan tin mas conocemento di e materia complica di educa, lanta y guia un mucha. “Entre 0 y 4 aña ta pone e fundeshi di un mucha. Si sali for di e punto di bista, cu 95% di e muchanan na Aruba, cinco biaha pa siman ta bay crèche, unda ta pasa mas di 6 ora, ta di suma importancia pa e guianan ta bon ekipa cu tur loke ta trata cuido, guia y educacion di mucha,” Ras a enfatisa.
Permiso
Actualmente cualkier persona cu tin minimo un MBO por lanta un crèche, hasta cu un “strafblad”. Esunnan clandestino ta creciendo barbaramente y no tin niun tipo di control. E exigencia minimo pa esun cu ta lider di guia ta un Mavo. Den pasado tabatin caso, unda a cera crèche door di peliger di candela. No tin niun caminda cu nan mester registra y asina haya sa e exigencianan minimo y di calidad pa opera un crèche, esaki ta keda den man di e propietario. Fundacion pa Nos Muchanan ta e unico instancia, unda tin e crèchenan registra y actualmente tin 113 inscribi. For di e 113 crèchenan alrededor di 50 crèche ta activo constantemente cu e cursonan cu e fundacion ta brinda. Kemen ainda falta mas interes y sigur compromiso di parti di e otro crèchenan pa tambe participa y eleva nan calidad y conocemento di servicio y contenido.
Subsidio
Kisas subsidio ta un punto cu mester bin riba mesa tambe, specialmente mirando cu gran parti di nos poblacion ta draai riba sueldo minimo, cu ta bou di e “bestaansminimum.” E trabou ta hopi y ta implica un responsabilidad enorme pa duna servicio, atencion y cuido di calidad. E mannan di e guianan di un crèche sigur ta yen y cu poco personal, pa mantene e suma mensual mas abou cu ta posibel, no ta facil.
“Gobierno ta subsidia Traimerdia y kisas por adapta y analisa e casonan di crèche tambe conhuntamente cu DAS, pa wak ki posibilidad tin pa yega na un tabel di subsidio, aunke cu crèche ta cay bou sector priva. E mayornan aki tambe merece pa nan yiu(nan) bay un crèche di calidad y duna nan e trankilidad pa por funciona bon na trabou,” Ras a indica.
Ley na vigor 1 Juli 2018
Unabes e ley drenta na vigor, hopi cos ta cambia. Na momento cu un persona dicidi pa pidi permiso pa habri un crèche, tin un cantidad di exigencia pa cumpli cun’e. E exigencianan aki ta pa garantisa y promove un miho calidad di cuido pa nos muchanan mas vulnerabel. E exigencianan ta varia y ta hopi detaya, manera; e cantidad di guia pa mucha, regla y procedura pa entrega keho y habri un crèche, boet di 25 mil florin, manual di exigencia pedagogico y maneho y mas.