Despues di mas cu 30 aña a confirma casonan di schroefworm den cervidae (Hert/Deer) na Florida USA.
Ta trata di e New World screwworm (Cochliomyia hominivorax). Diamars Veterinaire Dienst a haya confirmacion di esaki.
Aunke ta solamente den e especie ey tin casonan confirma, mester tene na cuenta cu e malesa aki por plama rapidamente pa otro especie y considerando cuanto mascota ta bin Aruba for di USA, mesora Drs. Irene Croes, hefe suplente y tambe dierenarts di Veterinaire Dienst, a tuma contacto cu e departamento oficial na Merca cual ta USDA/APHIS pa haci tur cos posibel pa minimalisa e chens cu un mascota por drenta Aruba cu un schroefworm no-detecta y causa un brote di schroefworm na Aruba. Pues a palabra medidanan necesario cu lo tuma.
Ultimo casonan di schroefworm na Aruba tabata na aña 2011. A haci uzo di muscanan steriel pa preveni reproduccion y hasina caba cu e malesa indeseabel aki, cu por asta haci daño na hende, pero danki Dios no a sosode.
Aunke cu e caso na Merca ta hopi isola, y Merca ta haciendo tur cos posibel pa elimina e especia aki mas pronto ta posibel usando tambe e muscanan steriel, mester tene cuenta cu horcan Matthew tambe a pasa eybanda cu por yuda plama e musca maligno aki mas facil.
Personanan cu ta interesa pa biaha cu mascota di Merca pa Aruba, of esnan cu ta bay cu vakantie Merca cu nan mascota, mester tene cuenta cu extra rekisitonan actualmente na vigor.
Veterinaire Dienst ta pidi tur veterinario pa ta alerto riba mascotanan cu ta bini pa consulta, tambe Santa Rosa y tur criadonan di bestia pa ta alerto riba nan bestianan pa yuda detecta schroefworm na ora.