Dialuna ultimo, dia 7 di mei, den cuadro di TRANSPARENCIA, e partido RAIZ a entrega un peticion na Gobierno pa informa y persuadi nos gobernantenan y publico en general pa reevalua e intencionnan berdadero tras di e desaroyo di cualkier proyecto comercial den areanan di naturalesa protegi, entre otro e construccion di un resort mey mey di e manglonan na Pos Chiquito.
Mesun atardi, nos movimento a ricibi un carta di Minister Otmar Oduber den cual minister ta confirma di a ricibi e LOB Verzoek di RAIZ referente na e proyecto di Isla di Oro y alabes invita RAIZ pa un reunion riba diamars, dia 8 di mei.
Lider Sr. Ursell Arends y colega di partido Sr. Raymond Kamperveen a atende e reunion cu Minister Oduber caminda den un forma transparente, Minister Oduber a haci entrega di un pakete di documento cu su ministerio a colecta referente na e proyecto en cuestion.
Pa nos di RAIZ ta di admira con, den un tempo record, Minister Oduber a cumpli di su banda. E echo aki sigur ta demostra cu nos isla ta cla pa conoce un politica di madurez, si nos como pueblo keda alerto – informando y conscientisando nos mes debidamente, continuamente. Pa RAIZ y publico en general ainda tin e tema di maneho y polisa pendiente, ya cu nos tur kier sa si gobierno ta bay publica e puntonan central aki den e proximo 4 aña.
Cu RAIZ no ta den gobierno, no ta nifica cu automaticamente nos movimento ta den oposicion. RAIZ kier fungi como monitor, y caminda mester asisti, coregi, aplaudi, nos lo haci tal, cu e mesun meta cu ta forma e fundeshi di nos movimento for di un principio: e Aruba cu nos tur kier biba riba dje y cu nos kier nos yiunan hereda.