Departamento di Impuesto ta recorda cu actualmente ta tumando luga e campaña pa brinda asistencia na e clientenan cu no por yena e formulario di declaracion di inkomstenbelasting 2015. E campaña ta termina dia 30 di November proximo y pues falta 4 dia (di trabou) so mas pa por ricibi ayudo. E clientenan por acudi na oficina principal na Camacuri of YMCA San Nicolas. Ta duna ayudo di dialuna pa diabierna for di 8’or mainta te cu 4’or atardi y no tin mester di haci un cita. Tur cliente cu ta cumpli cu e condicionnan ta bon bini.
Kendenan por participa?
1. Tur persona soltero cu tin un entrada bruto di no mas cu Afl. 50.000,-;
2. Tur persona casa cu – hunto – tin entrada bruto di no mas cu Afl. 75.000,-.
No por brinda ayudo na esnan cu tin un empresa propio of cu ta traha riba nan mes.
Na unda ta duna ayudo?
21 November – 30 November 2016 – YMCA San Nicolas – 8:00 am – 4:00 pm (non-stop)
21 November – 30 November 2016 – Oficina principal na Camacuri – 8:00 am – 4:00 pm (non-stop)
No ta duna ayudo riba diasabra.
Trece documento
Departamento di Impuesto ta pidi su clientenan pa trece e formulario di declaracion 2015 hunto cu tur documento necesario relaciona cu entrada y gasto, tanto na Aruba como den exterior.
Ta importante pa inclui tur comprobante necesario den e declaracion. Tambe ta recomenda pa e cliente mes yena e seccionnan cu ta trata su informacion personal y di su famia. Ta trata aki di e seccionnan 3, 4, 5 y 25.
Si ta trata di un pareha casa, mester tin tambe e ‘persoonsnummer’ di e señora.
Dia 30 di November ta ultimo dia cu por ricibi ayudo. Ta pidi tur cliente pa tene cuenta cu e fechanan pasobra no lo extende e campaña di ayudo aki.