Recientemente Carla Sno tabata di bishita na Aruba y a tene un mainta di informacion na oficina di Koningin Wilhelmina Fonds Aruba pa tur e boluntarionan envolvi den e parti di Thuiszorg, esta cuido di e pashent na cas. Durante e mainta aki Carla Sno, kende ta traha na Italia y ta psicoterapista specialisa den psicooncologie, a intercambia di idea y experiencia cu esnan presente.
Carla Sno ta specialisa den pashentnan cu cancer y ta guianan den e fase terminal tambe. Durante e mainta Carla Sno a informa y intercambia di ideanan y experiencia cu esnan cu ta traha riba e tereno aki. Semper ta bon pa corda e enfermero y enfermeranan e balor di nan trabou. Mester laga nan sinti nan mes comprendi door di otronan paso nan trabou no ta uno facil pero nan cuido y atencion ta necesario pa e pashent y su famia.
Pa famianan ta dificil pa acepta cu nan ta bay perde un ser keri. E famia por ta hustamente manera un remedi pa e pashent y si e famia acepta e situacion, nan por yuda e pashent pasa miho door di su enfermedad. Ora famianana no kier acepta e situacion y e enfermedad, esaki por ta un obstaculo. P’esey ta importante pa e enfermeronan haya cooperacion di e famia ya cu esaki ta alivia e trabou di ambos banda. Si e famia acepta, hopi cos por wordo resolvi y e famianan por biba miho cu otro y yuda e pashent pasa su enfermedad na e mihor forma posibel. Tempo ta precioso y p’esey ta importante pa famianan acepta y uza nan tempo hunto miho.
Pa mas informacion riba e topico aki por tuma contacto cu Koningin Wilhelmina Fonds Aruba na Spinozastraat 9 of via telefoon 5820412. Tambe por haya mas informacion via nos Facebook Koningin Wilhelmina Fonds Aruba y website Koninginwilhelminafonds.com.