LONDON, Inglatera – Prome Minister Britanico, Theresa May a bisa e miembronan di parlamento pa permiti Gobierno ehecuta e plan di Brexit of riesga di haya un pio deal cu negociacionnan cu Union Europeo.
Skirbiendo den The Telegraph, May a bisa cu e Gobierno lo cumpli na su timetable, cu ta inclui cuminsa cu e proceso formal di laga Union Europeo, na principio di otro aña, aunke cu Corte Supremo a dicta cu e no por bay asina sin consulta cu Parlamento prome.
May tambe a adverte parlamentarionan cu discusion publico riba e strategia di Gobierno pa loke ta Brexit, lo hiba na un resultado pio den negociacionnan, den su prome formal den publico desde e sentencia di corte di diahuebs.
“Awo nos mester boltia nos mente con nos por saca e miho probecho pa nos pais,” May a bisa.
“Esey ta nifica pa mantene nos mes na nos plan y timetable, sigui cu e trabao di desaroya nos strategia di negociacion y no pone tur nos cartanan riba mesa. Esey no ta na nos interes nacional y no lo yuda nos pa haya un miho deal pa Gran Britania.”
Tres di e huesnan principal, incluyendo Lord Chief Justice John Thomas, a dicta unanimamente riba diahuebs, cu May ta legalmente rekeri pa pasa un acto den Parlamento prome cu cuminsa formalmente cu e retiro di Gran Britania for di Union Europeo.
Cu e decision aki, May, kende a bisa cu ta un “principio importante” di democracia, ta na peliger, como cu e Gobierno ta prepara pa apela na Corte Supremo.
E prome minister a bisa cu e resultado di e referendum di Juni tabata “legitimo.”
“E Parlamentario y publico, kendenan ta lamenta cu e resultado di e referendum, mester acepta loke e pueblo a dicidi,” el a bisa.
May por a yama un eleccion general aña pasa pa fiha su posicion den parlamento y dun’e mas di bisa riba e proceso di Brexit.
Fuente: Business Insider (http://www.businessinsider.com)