Diasabra ultimo porfin e portanan di e pista di Palo Marga a keda habri pa asina e schedule 2017 pa loke ta trata Street Legal por a cuminsa. Expectativanan di den siman caba tabata asina halto cu e comision di The Revival of Palo Marga 2 a dicidi di habri un anochi di registracion cual a tuma luga na The House of Cake na Savaneta. Asina mes cu e anochi aki tabata hopi bon bishita diasabra atardi pa anochi a presenta un cantidad record di coredornan na pista di Palo Marga mes pa asina registra pa nan por a participa na e evento. Na cierto momento e fila pa drenta Palo Marga tabata extende su mes te na e rotonde di Weg Fontein y Weg Sero Blanco cu ni e vehiculonan di emergencia cu mester tabata na Palo Marga pa e evento por a start sali no por a yega y mester a bay busca un medida alternativa pa nan por a yega. Manera tur organisacion den su prome evento sigur sigur tin caminda pa mehoracion, pero e grupo di The Revival of Palo Marga 2 ta hopi entusiasma y motiva pa make things happen. Tur esaki sigur no tabata posibel sin e cooperacion di nos comerciantenan manera Brouwerij Balashi, Fast Equipment, Eumar lock and Key Services, Quebero Sand Blasting, AIS Catarpiller, Pest Buster Solution, Caribbean Trucking Company agencia di Kendall Motor Oil, RJ Road Cleaning Services, Jayko Septic Services, Serlimar y Spectrum Sound. Tambe e comision ta sumamente agradecido na tur e oficialnan cu a haci un trabao sublime y tambe e cuerpo di Siguridad, Ambulance y tambe Brandweer. Na Frenk Werleman y Frank Robles un danki special pa make things happen. Debi na e cantidad sumamente grandi di participantenan a pone cu pa 3or di marduga pa motibonan di siguridad a dicidi di postpone e categorianan di Street Legal Auto y tambe Street Legal Scooter y Quadracers. Esnan cu ainda ta den competencia den e 2 categorianan aki lo mester presenta dia 23 di Juni prome cu e qualifying pa asina nan termina e programa di e siman aki. Pa loke ta trata Jr. Dragster campeon a keda Joric Croes y sub campeon Gilrick Curie y den e categoria di Street Legal Bike Daniel Wever a keda como campeon y Norwin Dania a keda como sub campeon. Mane nos a bisa caba e proximo evento di Street Legal lo ta diabierna 23 di Juni y durante esaki lo core loke falta pa core den e 2 categorianan cu no a caba. Keda pendiente pa den e siman venidero The Revival of Palo Marga 2 lo duna mas informacion di nan proximo eventonan riba schedule.