Sr. Shurman Milliard ta splica mas tocante e proyecto di Telefon pa Hubentud, tocante termento. Esaki ta un proyecto cu a cuminsa 3 aña pasa, pero aña pasa a cuminsa cu e fase di training.
Telefon pa Hubentud ta un organisacion cu tin 17 aña caba y den e 17 aña nan ta haya hopi informacion door di e yamadanan y tambe door di charlanan duna door di Telefon pa Hubentud. Door di esaki a bin ripara cu problema di e termento tabata t’ey caba, pero esaki a keda crece door di e uzo di rednan social y tambe door di otro maneranan di termento.
Ta pa es motibo ey, Telefon pa Hubentud a scoge pa bin cu un proyecto nobo, esey ta Stop Termento. Nan a cuminsa cu ocho diferente scol. Nan a conduci nan propio investigacion y tambe nan a traha hunto cu CBS y nan ta hopi contento cu esey. Akinan nan a bin ripara cu e problema di termento t’ey y cu el a crece mas cu loke hopi hende ta pensa.
Sr. Milliard a duna cifranan di e indice di termento na Aruba, 54 persona of hobennan cu ta bay scol tin e problema aki y esey ta un cifra hopi grandi. Si compara esaki cu Hulanda esey ta 11. Y na Merca e ta 24. Dus ainda tin un caminda largo pa bay pa cu e problematica aki.
Pero cu e proyecto aki, telefon pa Hubentud a haya oportunidad pa traha cu 32 diferente scol. Y nan a haya oportunidad pa train 97 diferente maestro na Aruba mes, pa asina nan por bay bek na nan scol y mescos cu na La Salle College, pa duna e hobennan e oportunidad di haya sa kico termento ta. Y pa yuda esunnna cu ta wordo geter, pero tambe esunnan cu ta ter tambe.
Den termento tin esun cu ta ter, tambe ta un persona cu tin un problema. Y mester yuda na un manera diferente, y esaki por wordo haci door di organisa un caminata, informa di kico ta respet, kico ta e norma y balornan. Asina ta competi contra di termento y hunto asina so por laga e termento bira menos. Asina Sr. Shurman Milliard, di Telefon di Hubentud a splica.