GUATEMALA/MEXICO – Un sismo di 6,6 grado riba e escala di Richter a sacudi diaransonv arios ciudad na Guatemala y zuid di Mexico, cu e reporte di un persona morto y un herido, cortamento di coriente y daño na vivienda, fuentenan oficial a informa. E movimiento telurico aki a keda registra pa 1’or y 29 di marduga, cu epicenter na 156.3 kilometer west di Ciudad di Guatemala, den e departamento di San Marcos, frontera cu Mexico, e Instituto Estatal di Sismologia (Insivumeh) a detaya den un comunicado di prensa. E entidad a informa inicialmente cu e sismo tabata 6,6 grado, pero den un boletin nobo a coregi e dato na 6,9. E temblor a wordo sinti den mayoria di e regionnan di Guatemala, incluyendo e capital, Julio Sanchez, vocero di e Coordinadora Nacional para Reduccion de Desastres (Conred), encarga cu proteccion civil, a bisa periodistanan. E funcionario a indica cu un homber di 40 aña a muri den e pueblo di San Sebastian, departamento di Retalhuleu (zuidwest), ora cu un misa bieu a cay riba dje. E victima a wordo hiba un hospital cercano, unda el a fayece. Di su banda, Proteccion Civil di e estado Mexicano di Chiapas (zuidoost), a reporta cu den e municipio di Huixtla, un muhe a ricibi atencion medico ora el a sufri un caida “door di a core tras di e temblor”, pero su estado ta stabil. “Ta reporta dañonan modera na vivienda den zonanan zuidoost y ta registra cortenan di coriente den varios punto “di Guatemala”, Sanchez a agrega. Segun imagennan divulga pa socoristaan y prensa local, e temblor a provoca e colapso di murayanan di cas, voora esunnan construi cu adobe (lodo seco y yerba) den poblacionnan west. Autoridadnan Mexicano tambe a reporta dañonan menor den structuranan di cas y derumbenan riba caminda. Oranan despues di e movimiento sismico, Conred a declara alerta oranje na nivel nacional pa evalua e dañonan, mientras cu e Ministerio di Educacion a suspende e actividadnan escolar na Retalhuleu y den e departamentonan occidental di Quetzaltenango y San Marco. Guatemala sa sufri teremodo pa e convergencia di placanan tectonico Caribe, Cocos y Nort America, mescos pa e fayanan geologico local cu ta genera un serie di movimiento, den su mayoria imperceptibel. No obstante, e departamento occidental di San Marcos a wordo golpia na 2012 y 2014 pa sendonan teremoto cu a laga decenas di morto, miles di damnificado y perdidanan miyonario economico.
Fuente: www.eltelegrafo.com.ec