SEUL, Corea del Sur- Noord- Korea a realisa diamars un gran ehercicio militar cu municion real pa conmemora e fundacion di su ehercito, segun reportenan di prensa. Esaki ta bin na momento cu un submarino Norteamericano ta yega Korea del Sur, den e serie di preocupacionnan pa a programanan di arma nuclear y misilnan di Pyongyang.
E barco USS Michigan ta mara den waf di Corea del Sur na momento cu un grupo di atake encabesa pa portaavionnan Mericano ta dirigiendo nan mes pa e awanan teritorial di e peninsula Coreano y e enviadonan principal di Korea del Sur, Japon y Merca ta reuni na Tokyo.
E temor cu Noord- Korea lo por conduci un otro prueba nuclear of un lansamento di misilnan di alcance largo a aumenta durante e ultimo simannan, den un desafio di e sancionnan impone pa Nacionnan Uni.
Pero en bes di un ensayo nuclear of un lansamento di un misil, Noord- Korea a desplega un cantidad grandi di unidadnan di artileria di alcance largo den e region Wonsan, pa un ehercicio cu municionnan real, segun e ehercito di Corea de Sur.
Medionan estatal di Noord- Korea a mustra desafiante den un comentario cu a conmemora e aniversario numero 85 di e fundacion di e Ehercito Popular di Corea, bisando cu su ehercito ta cla pa pone fin na e historia di intriga y chantagenan nuclear di Merca.
China, e unico aliado di Noord- Korea, cu sin embargo ta opone na e desarroyo di armanan, a haci un yamada pa mantene e calma na varios ocasion y su enviado pa asuntonan di Corea, Wu Dawei, tabata na Tokyo diamars.