Riba Diabierna 17 di Maart den ora nan di mainta a tuma luga e prome ponemento di webo di un tortuga riba Eagle Beach na altura di Amsterdam Manor Beach Resort, y pa casualidad e momento unico a ser capta riba video pa un trahado di e propiedad cu tabata presente na e sitio. Esaki ta un momento hopi importante den e ciclo di nos naturalesa y nos kier a comparti esaki cu henter e comunidad di Aruba cu e proposito di yuda conscientisa tocante e epoca aki; y di biaha resalta kico ta e codigo di conducta corecto pa cu e bunita criaturanan aki cu ta keda bolbe tur aña na e caminda cu nan a nace.
Ta recomendabel pa e personanan no para dilanti di nan y no uza flashlight ni ningun otro sorto di luz cu por stroba e tortuganan. Tortuganan ta timido y tin biaha ta bay sin pone e webonan pa via cu tin hopi hende rond di nan cu por crea interferencia. Ora nan a traha na neishi y a caba di pone nan webo, nan mes lo bay lama bek. Si bo topa cu algun tortuga cu ta mustra confundi door di e luznan rond di dje, yama Aruba Turtle Hotline pa asistencia na number 592 9393 mesora.