Deporte ta trece hende hunto y ta haci personanan y nos comunidad saludabel. No solamente fisico, pero tambe mentalmente su influencia ta positivo. Pa medio di deporte nos ta siña norma y balor nan manera respet, obedece, ta puntual y sinceridad. Pa tur esaki por bira realidad, deporte mester ser practica den un clima sigur y saludabel.
Telefon pa Hubentud kier duna su aporte na esaki door di suministra e codigo di conducta pa deporte: “Wees Sportief, Wees Integer.”. “Wees Sportief, Wees Integer” ta un codigo di conducta pa deporte cu ta combati comportacion indesea na of rond di terenonan deportivo. Door di combati comportacion indeseable na of rond di terenonan deportivo, un clima deportivo sigur y saludabel ta ser crea. Esaki ta haci cu mucha y hobennan por practica nan deporte na un manera mas sigur y saludabel.
Desde inicio Fundacion Telefon pa Hubentud ta celebra dia National y Internacional di Derecho di Mucha (20 November) door di lansa un proyecto. Den e contexto aki Fundacion Telefon pa Hubentud hunto cu 2 organisacion deportivo (S.V. Dakota y White Sharks Baseball Academy), ta lansa riba 18 di November 2016 e codigo di conducta pa deporte: “Wees Sportief, Wees Integer”. Pa medio di un proyecto piloto Fundacion Telefon pa Hubentud lo yuda e organisacionnan deportivo ariba menciona, cu implementacion di e codigo di conducta pa deporte aki den nan organisacion.
Esaki lo tuma lugar riba 18 di November di 3:00 – 5:00 di atardi na Linear Park den cercania di Nikky Beach.