Estudionan Internacional ta mustra ariba e importancia di envolvimento di tata den educacion di nan yiu.
Yiu di e tatanan cu no ta envolvi cu educacion di nan yiu, tin mas chens di tin problema di estudio, tin mas chens di tin comportacion problematico, tin mas chens di bin den contacto cu amigonan problematico, ta expone mas comportacion criminal, tin mas chens di bin den contacto cu droga y tin mas chens di cuminsa tempran cu actividadnan sexual.
Segun un rapport di Unicef (2013) tatanan na Aruba no ta suficiente envolvi den educacion y cuido di nan yiunan. Banda di esey segun cifranan di Fundacion Telefon pa Hubentud Aruba, den 2015 y 2016, Situacion na Cas/ Relacion cu mayornan tawata ariba number uno di motibo pa tuma contacto cu Fundacion Telefon pa Hubentud Aruba. Un estudio cu Fundacion Telefon pa Hubentud Aruba a laga haci (2016) ta mustra cu 54,2% di e tatanan cu a participa kier ta mas envolvi cu educacion y cuido di nan yiunan.
Pa medio di un proyecto Fundacion Telefon pa Hubentud Aruba hunto cu Stichting Tienda di Educacion kier a contribui cu fortalece y apoya participacion di tata den educacion y cuido di nan yiu aki na Aruba. Na e manera aki tur dos fundacion ta cumpli cu nan vision y ta para pa derecho di mucha manera esaki ta poni den e Tratado Internacional di Derecho di Mucha.